انا بأعتذر لأســـتاذنا ولكل واحد بعتلى تاج علشان لسه مش هاقدر اعمله علشان مشغولة اوووووى لان طــبعآ نسرين أمة الاسد التانى سافرت الاسكندرية بتصيف يااااارب تروح وترجع بالســــلامة ياااااااارب آمـــــــين
اصل احنا اسدين قصر النيل اوعى حد يقولها
:D
معلش بقى انا عارفه انه بوست بايخ زيى بس بجد مخنوقة ومضايقة لو حد جرب شغل العملاء هيعرف قرفهم ايه الظاهر انا مكتوب عليا كل ما اروح مكان لازم اتعامل مع البنى ادمين نفسى اتعامل مع ورق بس لان برضو المحاماه سبتها علشان الناس وتعبهم
هل الذبون دائمآ على حق لا بقى مثل فاشل ولا اعتقد به لان اللى يجرب شغل العملاء ولمؤاخذة بقى و قرفهم ازاى تقعد تحايل وتناهد معاهم علشان يفهموا وهما اصلا ولا بيفهموا ولا حاجة خاااااااالص شئ متعب للغاية وكل واحد طبعآ والمود بتاعه وياسلام بقى لو اللى جاى عندك عايز يروح على نفسه وشكله حد زاقه عليك علشان يضايقك وياسلام كمان لو الميعاد مكتوب مواعيد العمل من كذا الى كذا وهو أصلآ مصمم يدخل عندك ويستفسار معلش هو سؤال صغير والله السؤال الصغير ده بيفرش مش بيسأل ده قهوة عايز شاى ولا حاجة ساقعة ويكون شايفاك مضايق وبتبص فى الساعة يعنى خلاص عايزين نمشى يقولك معلش بقى اخرتك معايا يخرب بيت كده اخلص يا عم حرام عليك عايزة امشى والميعاد فات من بدرى ولسه بيتى بعيد والله بأخد مواصلات لسه وكده وهو برضو قاعد يعنى ايه عايز
ولا واحدة بقى بجد قربت تخلينى اسيب الشغل والبلد ليها عايزة طريقة اتعامل معاها لانها خلاص جننتنى بجد باقلها سنة وسبع شهور بتسأل على الكورسات وتجى تمسك الكتاب وتقرأ فيه وتمشى شبه يوميــآ بجد بجد قرفت نفسى اطردها بس مش قادرة نفسى اعملها وش خشب
هل مــازال الزبون على حق
ومين بقى يجيب لنا حقنا
29 comments:
يا اختي احنا مفتقدين للتعامل ببشاشة في كل مكان بنروحه
فمعلش استحملي وابقي قدوة لغيرك عاجبك موظفين الحكومة المكشرين؟؟؟
انا طبيب بتعامل مع الناس اصحابي بيقلبوا الناس وياللا كل مريض ف ثواني دا شغل حكومة بقي
انا بفضل الله لا وبستحمل الناس
لله يا اختي لو عايزين ننهض بالمجتمع
معلش استحملي والاصلاح له تمن وتضحية
وتحياااااااااااااتي
وسلام الله عليك
السلام عليكم
الزبون دايما علي حق
حتي لو عايز مسمار فوق دماغه ويدق
صبرا جميلا
الناس دي حد غيرك هيموتها قريب
وهترتاحي منهم بسهوله ويسر من غير ما تاذي نفسك
ناس مستفزه صحيح
ههههههههههههههههههههههه
مستفزه
واخدالي باللك انتي
تحياتي
طبعا حبيبتي الزبون علي حق
انا معاكي انك بتلاقي زهق وقرف منهم ومن غيرهم بس انا كزبون مالي ومال اللي مضايقك وقارفك انا لي اخد خدمتي علي احسن ما يكون وانتي مبتسمالي كمان
مش كفايه العيشه حتبقوا انتوا وهي ع الزبون
سوري طبعا لو رايي مش عاجبك
عغ العموم جزاكي الله خيرا ع الفضفضه الخفيفه دي
أعانك الله وأعاد إليك الأسد الثاني
مين قال إن الزبون دايما على حق
الزبون إنسان يخطيء ويصيب ممكن كمان يستعبط
واحد اتصل وكنت لوحدي
ألو عندي مشكلة
أيوة بس ميعاد الشغل انتهى ومفيش حد
مين بيخدمك
مش عارف
شكله إيه
صراحة مش عارف
اسمه إيه
باين محمد
محمد1 ولا محمد2
مش عارف
طيب حضرتك خد تليفون محمد1 كلمه
قال لي ده معايا ومش بيرد
قلت له خد تليفون محمد 2 كلمه
قال لي يعني مفيش حد عندك
قلت له لا أصل الموعد انتهى
قال لي يعني انت قاعد كدة ما تعرفش حاجة خالص ومالكش في حاجة خالص
قلت لا أنا المدير
يظهر كل ده عشان يوفر مكالمات موبايل
مين يدي له الحق يبقى بهذه التنبلة ومش عارف حاجة والاستفزاز ويتجاوز في الكلام كمان
طبعا الزبون على حق دايما
ولا ايه يا باشمهندس عصفور
ههههههههههههههههههههه
هو فاهم الضحكة دى معلهش
الزبون عاوز الحق على طريقتة
وطبعا طبيعة شغلنا احنا هتلاقى فيها البدع لاننا كمان ساعات مش بنكون مرتبطين بوقت يعنى ساعات حد يتصل بيك فى نص الليل ويقول عندى مشكلة اصل انا بشتغل بالليل فى الوقت الرايق طيب ياعم وانا مالى انا يعنى انا يرد امال احل المشكلة ازاى اتكلم يا فندم الصبح يعنى هفضل كدة لحد الصبح يخرب عقلك طيرت النوم من عينى يا عم احنا فى رمضان وعاوز انام علشان اقوم للسحور وده مفيش فايدة قمت قافل السكة
من موقعي كزبون اقدر اقول لك أيوووووه الزبون دايما على حق ..
أما من موقعي كمبرمج بتعامل مع عملاء للأسف .. فالزبون بطيخة وحشري ورغاي
أحسن حاجة الهدوء مش عايز اقول والبروووود كمان .. آه مش لازم كل حاجة تاخديها جد قوي .. صدقيني دي أحسن حاجة
اااااااااااه يانى
جيتى على الجرح يا بنتى
الزباين و اللى بيعملوه فينا
بصى انا كنت الاول بحرق فى دمى زيك كدا لغاية لما كنت هختفى و جاتلى كل الامراض
و بعدين قررت ان المعاملة بالمثل
زبون كويس و محترم على عينا غير كدا باه فيه معاملة تانية
بس طبعا طبعا الزبون على حق دايما ههههههههههه
و لا كانى قلت حاجة
ماا عليناا
بصي انتي كلامك صح بس مش اوي
اصل ساعات بيكون الخطاء من عندنا
اقصد من الشركه
تحياتي
وشكرا لزيرتك الجميله
مصراوى اوى
أكــيد انا مع حضرتك لازم الواحد يعامل الناس كويس بس برضو فى المقابل يكون اللى قدامك مقدر وعلى الاقل يحترمك
اما بقى مهنة حضرتك ده مريض طريقة التعامل بيكون مختلف ام بقى اللى عندى
بيكون بكامل صحته يعنى المعاملة في فرق اعانك الله ووفقك ووفق جميع أطبـاء مصر
:D
تحياتى لحضرتك وأهلآ بحضرتك
===================================
الاسـتاذ مهند
وعليكم السـلام ورحمة الله وبركاته
هههههههههههههههه
ضحكتنى فعلآ لانهم كلهم عايزين مسامير ههههههه
الله المستعان
ايون هاذاكر كويس فى درس الاستفزاز
:D
=================================
karamella
هههههه لازم طبعآ ابتسم حتى لو بأموت ولا زعلانة لانه فعلآ هو مش ذنبه حاجة
بس برضو اذا امرت ان تطاع فأمر بما يستطاع
لا طبعآ من حقك تقولى رايك وتنقدى
بس والله ساعات بأوصل البيت منهارة من البكاء اصل مش كل الزبائن زيك يا قمر فى ناس منهم اجرك الله منهم
انا سعيدة اوووى برايك وبزيارتك
وجزاكى الله خـيرآ مثله
==================================
أســـتاذنا
واعانك الله يا أســتاذنا ويسرلك كل امورك ياااااااااارب آمــــــــين
والله يا استاذنا ضحكتنى
لان فى واحد دخلت عندى بعد الميعاد بنصف كنت بأقفل وقعدت ترن فى الجرس بطريقة عجيبة قالتلى معلش سؤال صغير هى وقاعدةو ايه مفيش شغل عندكم ومفيش ناس ليه هو المكان بتاعكم نايم كده ليه
وقولتلها نعم حضرتك الميعاد خلص وردت وقالتلى طب ايه اللى مقعدك لغاية دلوقتى قولتلها حضرتك قالتلى طيب امال مفيش مدرسين ليه وهاتك يا أسـئلة من النوعية دى طب استنى حضرتك اقولك المفيد وهى ولا هنا طبعآ اخدت ساعة ونصف كاملة بعد الميعاد وهى بتحكى
ربنا يعينا ويعين الجميع ويكون معانا
===================================
الطائر الحزين
واى طريقة بقى لان طرقهم كتير والله استغربت اوووى حتى لو الشغل مالوش ميعاد مش من حقه انه يكلمك بالليل لان فى حاجة اسمها ذوقيات وادب فى التعامل
اما هما لالالا ازاى كانهم اشتروا البنى ادمين
ربنا يعينك يااااارب آمـــــين
==================================
باشمهندس ماعلينا
ايوووة لو زبون تطلع عين مقدم الخدمة
أممممممممممم
اما بقى لو حضرتك مقدم الخدمة يبقى الزبون مش على حق
اصله ممكن كمان يكون زبون مقهور ونفسه يفضفض ويحكى يا سـلام
هههههههه
والله ونفسى اتعلم البرود مع العملاء
:D
علشان الزبون ياخد حقه تالت متلات
===================================
دكتور ماعلينا
واى حرقة دم اصل العميل عندى مش برشامة وهيمشى لالالالالالالالالا ده بيقعد يفهم ويستفسرويحكى
ههههههههههههههههههههههههههههههههههههههههههههههههه
والمشكلة دى معاملات يومية وطبـعآ بيأثر عليا وعلى انفعالاتى معاهم فى البيت
===================================
محمد العنانى
اكيد كلامى مينفعش يكون قاعدة عامة وبرضو مينفعش يكون الزبون على حق قاعدة عامة برضو
بس حضرتك ما قولتش العيب فى الشركة ليه امممممممممممممم
لا طبعا مش دايما على حق بالعكس زى ما حضرتك قلتى بقى يستاهل الضرب احيانا وبيستغل حياء اللى ادامه كمان يعنى خاصة اذا عرف انه مش صاحب المكان نفسه وانه بس بيشتغل فيه نعمل ايه بس ناس معندهاش دم
انا بهلول
انا جيت مسافه طويله للجنوب علشان احييكى على وقوفك بجانبى فى وجه بهلوله
وكلامك الراقى لها
المهم
ليس دائما الزبون على حق
الزبون الذى يريد تضيع الوقت او الاستظراف لا يمكن ان يكون على حق
ولكن الزبون الذى يريد فعلا الشراء هو من قالوا عنه
الزبون على حق
وفقك الله
خدي اجر من ابتسامتك في وش الناس
وكمان خلصي شغلك
وبعدين انتي شكلك متغاظة علشان مروحتيش تصيفي
بالليل ابقي روحي حديقة فريال
:)
والكاظمين الغيظ والعافين عن الناس والله يحب المحسنين
ربنا يعينك ويصبرك
عامل الناس بما تحب ان يعاملوك
بالرغم انى حاسس بكلامك وعارف ان في ناس فعلا تجنن بس هنعمل ايه لازم نستحمل ولا هنبقى زي الناس اللى احنا اصلا مش عاجبنا حالهم
السلام عليكم
ازيك يامنمونتى وحشتينى اووى
ربنا يكون فى عونك وربنا معاكى فى شغلك
بس الزبون مش على حق على طول بالعكس ده معظم الوقت غلط
وده بجد
كل واحد فاكر نفسه ان هو صح مش هما بيقولوا الزبون على حق يبقي كل واحد يقول حاجة او يعمل حاجة ويقولك انا على حق
بصراحة ربنا معاكى
امانى
ربنا معاكى . معلش ياامانى هو
الزبون دايما على حق علشان ده
من مصلحه البائع انه يخلى
المشترى يجى تانى ويشعره انه صاحب حق
فى جميع الأحوال الموضوع عايز صبر
وموهبه فى البيع فى ناس تحب تتعامل مع بشر رغم وجود غلاسه احيانا وفى ناس
تحب تتعامل مع ادوات
المشكله ان حاليا مافيش اختيارات
الوظيفه المتاحه بنقبل بها
ربنا معاكى يحميكى ويقوقى
مدونتك رائعه
سلامى وتحياتى
امام الجيل
ههههه المشكلة فى الغلاسة
:D
خلاص هاضربهم بس حضرتك هتتحمل المسئولية
:D
=================================
بلهول ولا بلهولة
بس اقول لحضرتك خلى بالك من بلهولة مش هتلاقى فى طيبتها
والدليل ان حضرتك مستغل اسمها وصورتها كمان
:D
ايوا الزبون على حق اللى هيشترى واللى مش هيشترى بس يعاملك كويس
تحياتى لحضرتك
==================================
عمو كراكيب
والله بأبتسم بس هما حضرتك مش هتتخيل بيعملوا ايه فينا
:D
اهو ابتسمت
لالالالا مش متغاظة ولا حاجة بس هاموت من العيظ
هههههههههههههههههههه
اروح فين فريال اها اها اها
:D
===================================
الصارم الحاسم
ويعينك ويعين المسلمين اجمعين يااااااااارب آمــــــــين
===================================
عبدالرحمن
عامل الناس بما تحب ان يعاملوك
ما هو ده اللى فعلآ بيحصل بس للاسف هما مش بيعلمونى كويس خااااااالص
يلا ربنا يرحمنا من عنده
==================================
قطــــتى
وانتى اكتر يا قطتى يا عســــل
ويعينك ويخليكى لينا يااااااااااااااارب آمـــــــــــين
==================================
كلمــات
الزبون دايمآ على حق
اممممممممم
والله عندى صبر والحمدلله بس المشكلة انه ممكن واحد يخرجك من صبرك والهدوء اللى الواحد فيه بالاستفزاز وطولة اللسان والغلط بدون داعى
ربنا يعينك ويعينا ويعين الجميع يااااااااااااااارب آمــــــــــــــين
الزبون ليس فرد يمكن الحكم عليه
الزبون انا وانتى واخى واخيكى وجارنا
الزبون متعدد الصفات
فلا يمكن ان نقول الزبون على حق
طيب اللى جاى يهرج ويستظرف وحتى يعاكس
يبقى على حق
بالطبع لا
وفى نوع تانى مؤدب ومحترم وجاى يشترى
ومع خبرتك فى هذا المجال تستطعين ان تفريقى بين هذا وذاك
يااااااااااه علي الزباين وقارفها
انا مجرباهم برضه
بجد هعتزل قريب بسببهم
شوفي ياستي المشكلة جاية من الأصل من أنعدام الثقة بين الناس وأفتراض الأسوء
بتقولي أزاي
يعني لما صاحب القضية يروح للمحامي وهو حاسس أنه بيضحك علية
والزبون يدخل المطعم وهو مفترض سوء الخدمة
والمريض يروح للطبيب وهو مفترض الأهمال
و المواطن يروح قسم الشرطة وهو مفترض العجرفة و عدم الأهتمام وتلفيق التهم
هنا يبدأ يشك ويسأل ويستفسر ويبحث ويرجع يراجع الكلام ويشك ويتوجس ويتراجع ويهاجم
وهنا يصبح العميل صعب التعامل ويصبح دائما علي خطأ
والمشكلة التانية أن أحنا شعب من الخبراء يعني المريض يروح للطبيب وهو حاسس أنه بيفهم في الطب والمقاول يروح للمهندس وهو حاسس أنه فاهم أكتر منة وهكذا
طبقي الأمثلة سابقة الذكر علي كل حاجة تقريبا بس خلي بالك أن كلنا في كل يوم بنبقي عملاء يعني المدرس عميل عند الطبيب و الطبيب عميل عند الميكانيكي والميكانيكي عند الجزار وهلما جرا
حلوة هلما جرا دي
ولا أقولك بلاش كلمة عميل دي ليمسكونا مع جواسيس إسرائيل
سلام وشكرا لسؤالك عني
بنت الجنوب
:)
السلام عليكم
انا اشتغلت في الكوستمر سيرفس سيادتك 3 سنين بالتمام والكمال
ومش في مصر
لأ في امريكا
حيث الزبون مش بس علي حق
وكمان متدلع
ودلعه مرق
بكسر الميم والراء
وعايز ياخد حقه وحق الامة كلها
وبيقولها ببساطة لو مش حتبسطوني
مش حشتري عندكم
وده خط احمر عند اي شركة في امريكا
كله الا فقد العميل
اللهم لو كان العميل بيستهبل بجد
بس اتعلمت حاجات
اتعلمت مسايسة الناس
ومهارات التفاوض
والاستماع والصبر علي الانصات للشكوي
وتحويل غضب الزبون الي رضا وفرح بل وانتماء للشركة
واتعلمت حق الزبون اللي اختارني بالذات - اي شركتي - انه يحط فلوسه عندي بشرائه منتجي مع ان فيه مليون منافس غيري ويقدر يشتري منهم بسهولة
صحيح بعضهم عايز مش بس ضرب النار
لا الاعدام شنقا وحرقا وسلقا وطرقا
:)
بس الصبر جميل
وزي ما قال الصارم الحاسم مع اننا بنختلف في دبان و شنا
بس هو قال آية في الجون
"والكاظمين الغيظ والعافين عن الناس والله يحب المحسنين"
بس برضك ممكن تاخدي حقك لو حد تعدي بقلة الادب وتضييع الوقت
وكدة
انا شايف ان معظم الناس اللي علقوا عاوزينك تصبري
عشان هما اكثرهم زباين
:)
بس انا حقف في صفك شوية
بحكم الزمالة في موضوع خدمة العملا
يا جماعة
خدمة العملا من الوظايف الممتعة قوي
والمقرفة قوي
يعني لازم تجربها عشان تعرفها
وساعات فعلا بيكون الزبون عايز الحرق
وفورا
وباول عود كبريت ف ايديك
بالراحة شوية علي الاخت
:)
يعني لو فلتت اعصابها مرة ولقيت نفسها فوق العميل بتضربه بالشبشب
يبقي نعذرها برضة
ونقوللها
المرة الجاية تضربه بالراحة بس
:)
ربنا يجزيك الخير
ويوسع عليك الرزق
ويجعل صبرك في ميزان حسناتك
ويجعلك مثال للموظف المتقن لصنعته
الحافظ لامانته
لا الزبون مش دايما على حق وانا معك ان هناك نوعيات تخنق هيا مش عايزة تشترى هى جاية علشان تخنق بس ده هدفها والى تحسى انو من النوع ده اول مايسئل على اى طلب الرد السريع مفيش مش موجود كل الانواع الى حضرتك عايزها مش موجوده واذا اصر اشعرية بالمسئوليه قولى له سوف احجز لك فى الاسبوع القادم واذا رايتى جديه فيه وانه يريد الشراء اعطيه مايريد
القسام
معلش يا مونى
انا جربت فعلا التعامل مع الزباين
وعارفه القرف اللى بيحصل
وخاصه ان فى نوع منهم بجد بيبقى غلس
ومهما حاولتى مش بيحس على دمه
وكأن الخدمه واجبه عليكى
مهما كان غلس
بس هقولك فى الآخر
عاملى ربنا بجد
ابتسمى وخدى أجر البسمه فى وش غيرك
اكسبى ثواب بجد على كل لحظه صيق بتمر بيكى وانتى بدل ما تكشرى بتبتسمى فى وش الأخرين
ربنا يكرمك يارب
وحشانى كتير
محبتى
عازف الناى
صـدقت يا اسـتاذى الفاضل
الزبون انا وغيرنا
بس للاسف فى زبون بيكون صعب معاه التعامل
والمؤدب طـبعآ على عيـنى وعلى راسـى وبالعكس هتقوم معاه بالواجب لانه محترم
تحيــاتى لحضـرتك واهلا بحضرتك
===================================
سـمراء النــيل
أزيك يا عســل
هتعتزلى لالالالا اوعى تخليهم يعملوا فيكى كده
خليكى شاطرة
:D
واتعاملى بسياسة النفس الطويل
===================================
سـكتم بـكتم
أنـعدام الـثقة
والتعالى
والفهم
وانك شغال عنده
ده مبدأ اغلب العملاء
تصــدق فعلآ وكمان خبرة الشعب المصرى فى كل شئ والمشكلة فى العجرفة ومش مستنى يفهم لانه حاسس نفسه فاهم اكتر ده اكتر شئ يتعب
والله بأحاول اقدم الخدمة على احسن ما يكون ولكن فى المقابل يكون العميل على قدر من الاحترام وتقدير لمقدم الخدمة
لاننا كلنا فى الاخر بنى ادمين
فعلآ كلنا بنكون عملاء وزباين عند الاخر
:D
لا شكـر على واجب
===================================
ibn_abdel_aziz
بسم الله مشاء الله 3 سنين انا باقلى سنتين وهلم ورق فى الشوارع منهم
:D
اقول لحضرتك العميل يدلع براحته بس يحترم اللى قدامه يكون مش يكون دلع وقلة احترام لا ن كده بيبقى كتير اوووى
تحيــاتى لحضـرتك واهلا بحضرتك ===================================
alqassam
ما هى دى المشكلة اللى بيكون جاى علشان يخنق فيك ويضايقك ويغلس ويطلع روحك ده هدفه اللى جاى علشانه
تحيــاتى لحضـرتك واهلا بحضرتك
===================================
ريـــمو
ازيك يا جميل
تصدقى انا لحظت حاجة فى العملاء انك لما تعمليهم بما يرضى الله يفردوا نفسهم على الواحد اوووى والحمدلله انا ربنا كرمنى بالصبر بأصبر ولكن لما بأرجع البيت باكون خلاص تعبت ومش طايقة اكلم حد من كتر الكلام والتعب ويوصلنى لدرجة اننى ممكن انهار من البكاء كده بقى يبقى كتير
:D
الاول و قبل اي حاجه يعني ايه زبون دي علشان بس نعرف نتكلم مع بعض
هههههههههههههههههههههههههههههههههه
انا عاوز حضرتك تحطي نفسك مكان الزبون الاول و بعدين نتكلم
يعني لو انتي الزبون و رحتي مكان ما متأخره و الموظفين عايزين يمشوا ياترى هاتعملي ايه ؟!!!!
لو فعلا عملنا كده اكيد هانتعرف و انا اولكم ان الزبون دائما علي حق
D
لكي تحياتي
أســتاذ مراغى
الزبون يعنى عميل عندى وموكل عند المحامى ومريض عند الطبيب والصيدلى
ههههههههههههههههههه
وصلت كده
اى خدمة اقول بقى لحضرتك انا بأضايق اووى من اى حد كان يروح عند موظف خلاص هيمشى الا اذا الموظف ده أصلآ مش قاعد من اول اليوم وجاى متاخر ولما الاقى الموظف بيتكلم مع حد مش اقوله خلصنى واشخط فيه لانه مش شغال عندى انتظر الاول وبعد كده اتكلم
اما بقى لما تجى واحدة اصلا بتخانق لامؤاخذة دبان وشها واول ما تدخل تقولك بأقولك ايه خليكى معايا والتانى يبصلك بنص عين هتخافها ولا هتعمل ايه
قولى حضرتك هتعمل ايه ساعتها
؟؟؟أمممممممممم
ولو ان كلامك عن الزبون برضه مش واضح لكن يمكن اكون فهمت :P ههههههه
واكيد لو ده حصل هاعمل شاي
هههههههههههههههههههههههههههههه
و شكرا علي التدبيسه بتاعة التاج دي يا باشا
لكي تحياتي
استاذ مراغى
ازاى يعنى ما فهمتش ايه طلعت مدرسة فاشلة مش بأعرف اوصل المعلومة هههههههههههههههه
باقول لحضرتك يعنى لو شغال فى السكرتارية وبتشرح للعميل اللى قدام حضرتك حاجة وجه حد تانى بتقوله اتفضل من المفروض والذوق يتفضل ولا يقعد يقولك خلصنى والعميل اللى بتتكلم معاه يبصلك علشان يشوفك هتقول ايه ولا هتعيد ايه ولا هتفضل تتكلم مع اللى لسه داخل
هتعمل ايه حضرتك ساعاتها
:D
لازم بقى تعمليه ان شاء الله
تحياتى لحضرتك
انا صيدلى وزهقت بل قرفت من الزباين ونفسى اولع فيهم بجاز دول طلعوا روحى وكرهت المهنة بسببهم ولو حاولت ارد عليهم هى كلمة واحدة اللى متفقين عليها وبيقولوها انت جاى هنا تخدمنا وهنشتكيك للكفيل
معلش يااختى ربنا ع الظالم
Post a Comment