السلام عليكم ورحمة الله وبركاته
انا مش عارفه اعتذر ازاى لان خلاص الحكاية بقيت ماسخة خاااااااالص كل شوية والتانى اعتذار والله مشغولة على الاخر وظروف شغلى اتغيير تمامآ ارجوا من الجميع ان تسامحونى لانى مقصرة مع الجميع
وكمان كنت مشغولة علشان انتخابات المحليات وكنت فى ورشة عمل ومن المفروض بأجهز فيها نفسى بس للاسف الشديد اخى العزيز قرر خوض الانتخابات وطبعا هو وطنى والوطنى الايام دى عاملة نظام شغل على تقيل انتخابات وحركات داخل الحزب بدلاً من المجمع الانتخابى سابقاً علشان يقفلوا الدنيا على المستقلين والمعارضة وكنت خلاص جهزت نفسى للاسف الشديد قررت التنحى عن هذه الخطوة التى حلمت بها كثيرة وعملت شوط كبير فيها
ليس كل ما يتمناه المرء يدركه
هذا ما حدث معى وانا حالياً ربنا اللى يعلم بيا فى حالة نفسية سيئة طبعاً الكل بيسال ليه ما تدخلى الانتخابات
كل المعارف اتصلوا عليا وقالوا ليا يا امانى بلاش انانية انتى كده هتخسرى اخوكى ايه يا جماعة هو انا هو هنقعد على مقعد واحد ده محافظة وانا اخرى قرية يا مركز
وقعدت احسبها مع نفسى وقررت واخيراً انى اتنحى عن هذا القرار والحسرة يعصر قلبى اختيار صعب يا اخسر اخى يا اخسر الانتخابات طبعاً الانتخابات هتتعوض لو ربنا سهل
وليا اسباب اخرى لو قررت فعلا انى انزل الانتخابات كنت هأكون لوحدى لان الوالد اهم هو اولى منى ده اللى سمعته بعد قرار اخى لا وكمان هما اللى قالوا له انزل واحنا وراك يعنى انا كده فى الهوا
وكمان انا مستقلة يعنى مش تبع الوطنى وكنت عاملة حسابى على مقعد المرأة لان فرصتى فى النجاح كانت ضعيف للغاية لانى مستقلة ومعارضة و لان المعارضة فى اسوان وفى كل الجمهورية اى كلام بأقولها وبكل صراحة اى كلام واخرهم كلام مفيش حد عايز يتعب كله متنسى الفرج فرج ايه مش عارفه هو فى حد هيعرف ياكل من غير ما يبحث عن الاكل
دعواتكم ليا اخرج من الحالة النفسية السيئة اللى انا فيها يمكن هو ده اختيارى فى الواضح بس طبعاً غصب عنى
رجاء من الجميع الانتباه كويس للمحليات وهذه المحليات ليس مثل اى محليات ولازم كل واحد يعرف اهمية المجلس المحلى واللى عايز ينزل يلحق اخر موعد يوم الخميس
26 comments:
اكيد طبعا حضرتك متخسريش اخوكى
بس متخسريش مبادئك فى الحياة
مهما حصل
وجميل ان حضرتك معارضة وربنا يوفقك
بس معرفتش حضرتك هتنزلى ولا لا
مفهمتش
عموما ربنا يوفقك وييسرلك امورلك
السلام عليكم
منمن وحشتييييييينى عامله ايه ربنا يفك كربك ياحبيبتى معلش
تتعوض ان شاء الله بس حاولى متتخليش عن حلمك بعد كده انا عارفه انه صعب بس طالما مكنتيش هتأذى اخوكى خلاص عموما كل تأخيره وليها خيرة :)
السلام عليكم ورحمة الله وبركاته
حمد الله علي السلامه يا امونه
ومعلش ياستي خيرها في غيرها ان شاء الله
المهم هو اخوكي وعلاقتك بيه
الاخ عمره ما يتعوض
يا بنتى مش انا قلتلك انى وراكى ومعاكى
يعنى انا عمالة اعملك دعاية هنا فى اسكندرية واقولهم صاحبتى حتبقى من الطبقة الحاكمة تقومى تنسحبى
ياللا..خيرها فى غيرها اهو تدخلى على مجلس الشعب على طول احسن برضة
بس ياريت تركزى فى التدوين بأه
حمدا لله على سلامتك ياجمل بنت فى الجنوب
وحشتينى موووت
ووحشنى طلتك فى مدونتك
الف حمد لله على السلامة
مدونتك زادت نور
ومعلش اختلف معاكي في أهمية المحليات .. يا ستي لو كان لمجلس الشعب أهمية يبقى للمحليات أهمية .. القرارات تصدر من المحافظ .. والمجلس المحلي سكرتارية تمرير قرارات .. معرفش .. أنا بصراحة لما بقرا كلامك بحس إن أسوان عندكوا غير مصر كلها ...
وبعدين حتعملي إيه لو اترشحتي عن دايرة وفيها حد غلبان أو فقير .. او دابة عرجت في الطريق .. حتقدري تتحملي يوم القيامة .. خلي اللي عايز يشيلها يشيلها ... حتقدري تلفي عليهم وتتأكدي إن كل واحد معندوش مظلمة .. حتقدري تتأكدي إن مفيش حد دعا عليكي قبل ما ينام عشان حاول يقابلك ويديكي شكوته ومعرفش فدعا عليك في جوف الليل ..
لو جو البلد يسمح وفيه أمل .. اقول لك ماشي .. لكن لسه أنا على كلمتي .. مشاركة النظام الحالي ولو بمجرد ممارسة دور المعارضة يعتبر مشاركة في الظلم
بيني وبينك
وكلام في سرك
وما تقوليش لحد
.
.
.
كده احسن
:)
وطني؟
وطني؟
وطنـــــــــــــــــــــــــي؟
ماكنش العشم
تحياتي
متابع حضرتك من زمان
دا أول تعليق ليا هنا
بس بما أني عندي حساسيه من الوطني
فا حييكي على موقفك بس ومش هتكلم عشان خاطر اخوكي
محبتي
ايه اللى يزعل فى كدة؟؟؟؟
سبحان الله العظيم
عموما مجرد الفكرة والايجابية
احييكى عليها
تحياتى
دى اول مرة ازور مدونتك بجد جميلة اوى انا بحسدك على جراءتك فى تناول قضايا كلنا عارفنها وبنتغاضى عن ابداء اى رد عليها يا ريت نكون اصحاب وتزورى مدونتى فى انتظار جديدك
حمد الله علي السلامه يا استاذه
ربنا يوفقك المره اللي جايه يكون اخوكي مش نازل
و الاخ هو اللي هايبقا
امام الجيل
لا انا مش هأنزل لانه مينفعش انزل
ارجوا من الله ان اصمد ومأغيرش مبادئ
تحياتى لحضرتك
===================================
HoNdA
بـــــــــــخ
وحشتينى يا رغاية
ايوة يا قمر دعواتك اوعى تنسى دعواتك تحياتى لكى يا قمر
===================================
خمسة فضفضة
وعليكم السلام ورحمة الله وبركاته
الله يسلمك يااااا عسل تسلمى يارب
ايوة ما انا قولت كده برضه بس اكيد زعلانة
دعواتك
تحياتى لكى
===================================
امولتى
شوفتى يا امولتى كل شوية ادوشك وقولك الانتخابات والانتخابات والمرأة والرجل وفى الاخر بعد الدعاية اخلع معلش بقى الدعاية علينا كنت اتمنى ان يكون فى حد جنبى يكون معايا يفهمنى بدلا من انهم محسسينى انى مجنونة ولا فى بيرزة من البرايز اللى عندى ضرب
دعواتك بقى
تحياتى لكى
===================================
رفقتى
الله يسلمك يا رفقتى ربنا يخليكى ليا ياااااااارب آمـــــــين وانتى كمان وحشتنيى اووووووووى
دعواتك
===================================
باشمهندس ماعلينا
الله يسلم حضرتك
ده نور حضرتك
لا بقى انا اللى اختلف مع حضرتك
لان الاتنين لهم قوتهم بس للاسف النظام الحاكم وجهل الناس باهيمة كل منهم ودور كل واحد منهم هى السبب فى هذه المشاكل اللى بنعيشها
وعلى فكرة لو المجلس المحلى قوى ومفيش فساد ثق تماما حالنا هيتغير
على فكرة خطة الدعاية اللى كنت ماشية بيها انى افهم الناس دور المجلس المحلى ايه ده كان هدفى الاول وبعد كده اى حاجة تانية لانى مش هيكون معايا خاتم سليمان انى اعمل المعجزات
انا برضو مش حضرتك فى حكاية اننا لا نشارك مع النظام فى اى شئ لا بالعكس لازم نشارك ونقول كلمة ونحاول وكل شئ ليها ضحايا ولازم يكون فيه ضحايا علشان البلد يقوم
وبخصوص ان حضرتك بتحس ان البلد مش زى عندكم هاقول لحضرتك ليه
لانى بأحكى بنفس خضرا هههههههههههههه على فكرة طبيعة البلد والعصيبة القبلية هى المسيطرة فى كل شئ علشان كده حضرتك بتحس بالفرق
على فكرة نفسى بقى أغير جغرافية مصر واحنا اللى نحكم ونكون العاصمة
:D
تحياتى لحضرتك
===================================
A.SAMIR
وطنى مين وطنى ده
هههههههههههههه
لالالالالالالالالالالالا انا مش وطنى حضرتك فهمت غلط
تحياتى لحضرتك
===================================
عبدالرحمن فارس
عندك حساسية بس من الحزب الوطنى طب كويس اوى انا افتكر عند حضرتك اكتر
لا اتكلم طبعا ده حرية شخصية
تحياتى لحضرتك
===================================
الطائر الحزين
اقول لحضرتك ايه اللى يزعل انى مش هأقدر انزل لانه مينفعش ننزل احنا الاتنين والولد اولى وهكذا
تحياتى لحضرتك
===================================
سارة علي
اهلا بيكى يا قمر ان شاء الله هازورها ونكون اصحاب يا قمر
تحياتى لكى
===================================
mraghy
الله يسلم حضرتك
يااااارب آمـــــــــين
وهو يكون معارضة
:D
تفتكر يا استاذ مراغى اسطورة الحزب هينتهى ولا لسه بدرى عليه
؟؟؟؟؟؟؟
تحياتى لحضرتك
ربنا يفك الحاله اللي انتي فيها دي
انتخابات
وترشيح
ووجع قلب
وفي الاخر ؟
ربنا ييسرلك الحال ويفك كربك
تخيلى انا كمان حالتى النفسية زى الزفت ومش عارفة اخرج من الحزن وربنا معاكى ومعاى
ياستى ولا يهمك نفضى يعنى ما اتصلحتش لما الاخوان خدوا ميت مقعد فى مجلس الشعب قوم هتتصلح فى المحليات
كبرى الجمجمة
معلش لو كلامى دون المستوى لكن دا الواقع
تحياتى
عمرو
سلاااااااماات
ربنا يكرمك يارب
ويساعدك ويعينك
ويسهل لك الامور
ويهديكى الى الاختيار الصحيح
سلام الله عليكم
أخبارك ايه
وأخبار المحليات
قوليلنا أخوكى عمل اية
وتحياتى
الي كل عشاق الحريه وكل من يحلم بها
هيا نتخيل الوطن والجامعة بعد أن حكمها البلطجيه
رجاء وضع الآراء
وتحيه علي الشغل الجامد ع المدونة
كنتي انتي بس ادخلي معارضة او مستقلة
والله كنت هديلك صوتي
كنت هبعتهولك ع الاميل
لان مش هنيفع في الصندوق
لأن صندوق المنصورة غير صندوق أسوان غير صندوق الحزن الوطني خالص
ربنا يعينك ويقويك وترجعلي منورة زي كل أهل أسوان
لك تحياتي
السلام عليكم
السلام عليكم
ازيك يامنمونتى ياحيبيبتى
انا كمان مقصرة جدا فى زيارة المدونات
ومكنتش اعرف انك كنتى هتدخلى الانتخابات وكمان صرفتى نظر عن الفكرة ديه
ياخسارة والله البلد هى اللى خسرتك
وان شاء الله تتعوض المرة الجاية
وربنا يوفقك فى كل خطووة يارب
السلام عليكم
للأسف البلد دي مافيش فائده من ممارسة السياسه فيها بشكل طبيعي أو بشكل صحيح .
الأفضل إنك تريحي بالك
السلام عليكم
حمد لله على سلامتك - الغيبة طولت
عندي شوية أسئلة
س1: ممكن تشرحي لنا في تدوينة بسيطة يعني إيه المجالس المحلية؟
س2: و ماهو الدور المرتقب للمرأة في المحليات؟
س3: وهل من الممكن أن يؤثر دخول المرأة المعترك السياسي على التربية الأسرية و استقرار الزواج؟ وهما أهم و أول واجبات المرأة
جزاك الله خيرا
و بعدين ما تزعليش نفسك
مجالات الإصلاح أكثر من أن نحزن إن فاتنا أحدها
فكري كدا ممكن تعملي إيه تاني للإسلام و المسلمين
هتلاقي أكيد
نفتقدك بنت الجنوب منذ فتره
لعل المانع خير
كوني هنا دائما ولا تبتعدي كثيرا
محبتي
شكرا جداااا
جزاكى الله خيرا
لان بجد كتير من الناس مش يعرفوا اهميه المحليات
Post a Comment