بنـت الجـــنوب

نفسى اكون اغلبية

2011-12-15T06:31:00.003+02:00

عنوان غريب بس ده حال لسانى الان واردده بأستمرار
بعد خلع مبارك فرحت قولت اخيراً مش هأكون معارضة وهأبقى طبيعية وللاسف الشديد ده ما حصلش لانه بعد ايام تقينت ان المعارضة الجديدة اصعب من اللى فات او بمعنى اصح هنرجع تانى لنقطة الصفر وانك تكون من ضمن العشرات المعارضين اللى هما مختلفين عن بقى البلد يعنى زى ايام كفاية فى بدايتها
واللى حسسنى انى هأفضل معارضة الانتخابات النهاردة جيوش من النور والاخوان وانا كنت بأدافع عنهم ومش منزعجة منهم ومش بأحب اقسى فصيل معين
ولكن خطبة الجمعة يحث الناس على انتخاب النور او الحرية والعدالة يا هتكون فى النار والله طب كويس انكم معاكم الجنة استغفر الله العظيم انا عارفة هتقولوا ده قلة
بنت خالتى داخلة اللجنة يا اختى ممكن اساعدك ياريت تديى النور لو مش عايزة النور يبقى ادى الحرية عشان ما تروحيش النار والله مشاء الله هو انتو معاكم الجنة واحنا منعرفش اممم طب بسم الله مشاء الله طب بتكدبوا ليه وتضحكوا على الناس ان اللى مش هينتخبوكوا هيروح النار
تصدقوا بقى انا بجد بأكرهكم وشكلى فعلا هأكون معارضة علطول
ياااارب نفسى اكون اغلبية

قائمة الثورة مستمرة

2011-12-03T11:22:00.003+02:00

انا هأنتخب قائمة الثورة مستمرة
هما فعلا مش معاهم فلوس ولا معاهم دعاية كفاية بس ان شاء الله هنشتغل لهم على الارض ومش هنسيبهم
اسوان كبيرة اكتر من 100 كليو لازم نتعب عشان واتمنى باقى المحافظات يدعموا قائمة الثورة مستمرة وعايزين نثبت للجميع مش لازم الفلوس المهم الصدق والتعب

تتضمن قائمة الثورة مستمرة في انتخابات مجلس الشعب بأسوان :
1 -عبدالله عبدالفتاح "فئات" وهو أمين حزب التجمع سابقا واحد أبناء النوبة.
2 -طارق عبدالمقصود السقلي من ادفو الكلح "عمال" وهو أحد شباب ائتلاف الثورة البارزين.
3- سمية الشاطر وهي احدي الناشطات في مجال العمل المدني ورعاية المعاقين وتنتمي إلي قرية البحيرة في مركز ادفعو.
4- د. حسن الدالي الناشط السياسي المعروف وطبيب العيون بأسوان "فئات".

قائمة الثورة مستمرة تعبر عن تحالف انتخابى يضع فى مقدمة اولوياته الحفاظ على مكتسبات الثورة وتحقيق اهدافها ...
كما يرفع شعارا له فى الانتخابات القادمة
"امــــــــــــان ....حـــــــــرية.....خــــبز ....عـــداله اجتمــــاعية"
وتم وضع عدة معايير لتأسيس هذا التحالف الانتخابى فى اهمها ان لا يترشح على قوائم التحالف ايا من فلول النظام السابق، وأن لا يدخل فى حالة النزاع والخلاف الحادة الحادثة الان فى الشارع المصرى بين بعض القوى والاحزاب السياسية والتى لا تضع اولويات الشعب والمواطنين فى مقدمة اهتماماتها

اهل النوبة لهم حق عند كل مصــــــــرى

2011-09-07T02:43:00.003+02:00

ايوة اهل النوبة ليهم حق عندنا كلنا هما اللى ضحوا بأراضيهم وتراثهم وعاداتهم وتقاليدهم والاراضى اللى اتعوضت جزء منها ولفترة زمنية معينة و نفعت ولكن مع تزايد عدد السكان والمكان اللى موجدين فيها مفيهاش ظهير صحراوى يعنى مفيش توسعات....فكان من الاولى يرجعوا بأسماء القرى السابقة الى ضفاف البحيرة وايه المشكلة فى كدة انا مش عارفة ويتقال بعد دراسة هذا المكان صالح للحياه والزراعة وبعيدة عن المخاطر والمناطق اللى مش هتنفع يبقى مش هتنفع

وبصراحة اكتر ما مدن القناة رجعوا بعد الحــرب يبقى هما كمان لازم يرجعوا

وكمان من حقهم الحفاظ على تراثهم اللى بدأت فى الاندثاروالتلاشى تماما دول ناس ليهم خصوصية فى عاداتهم وتقاليدهم حتى اللغة ....ولا ننسى ان مصر تتميز بأختلاف الثقافات ليه ما نحافظش على هذه الثقافات اليابان متقدمة ومازالت معتزة بكل خصوصيتها بالرغم من كل التقدم

وكمان فى حاجة بقى الاعلام والمسلسلات والافلام افهموا بقى ان النوبة خاصة والجنوب عموماً هما مش بس بوابين ولا بس خدامين ولا مادة فكاهية على اللون واللهجة وهما مش بس اغانى ورقصة ولهجة دول ناس ليهم اصول وتاريخ

وفى النهاية لازم الحكومة تكون عندها دراسات على الجغرافيا البشرية والطبيعية للمناطق وللاهالى حتى نتمكن من ايجاد حلول خلال فترة زمينة

خلوا بالكم من اهل الحدود سيناء واهالى النوبة كل واحد فيهم له طبيعة خاصة حافظوا على خصوصيتهم فى الخطط التنموية

انا ضـــــــد كافة اشكال العنــف

آسفة على الاطالة وعلى ركاكة الاسلوب

بيان ائتلاف شباب الثورة باسوان

2011-09-06T12:04:00.002+02:00

1- ان الاحداث الجسام والمتلاحقة التى تشهدها مصر الان وتشهدها محافظة اسوان تحديدا تدعونا الى الوقوف وقفة واضحة وصريحة من اجل اسوان ومصر فما نتج من مجريات و مناوشات اليوم فى اسوان و التى حدثت امام مبنى محافظة اسوان وحديقة درة النيل ومجلس المدينة وكذلك التصعيد الذى تم من الاخوة النوبيين الذين نناشدهم بعدم الخضوع لاستفزازات محافظ أسوان كما نناشدهم بضبط النفس خوفا على المصلحة العامة وحتى لا تفقد القضية النوبية الدعم الممنوح لها من الثوار والمثقفين و اهالى اسوان والشعب المصرى والجميع يؤكد ان مطالب النوبيين مطالب مشروعة وهى حق لا جدال فيه وعلى الجهات الرسمية سرعة العمل على تلبية هذه المطالب والتى نعلن تضامنا معهم فيها وهى كالاتى :
أ. اقالة محافظ اسوان وهو مطلب رئيسي لجميع اهالى اسوان

‌ب. الحفاظ على حقوق النوبيين الاصلية والمشروعة وتعويضهم التعويض المناسب وهى حقوق ندعمها ونصر عليها.

ج. اعادة تشكيل المجموعة التى سوف تعرض مشاكل اسوان على السيد رئيس الوزراء والتى تم تشكيلها بمعرفة المحافظ من معاونية واتباعة من الحزب المنحل حتى لا يتكرر مسلسل خداع رئيس الوزراء الذى تم فى سيناء وتضيع معه الحقيقة – ان هذا الامر تحديدا ينذر بمزيد من الاضطرابات داخل المحافظة .

2. كما ان شباب الثورة فى اسوان يرفض ما تم اليوم بمؤتمر ( ائتلاف القبائل العربية باسوان ) والذى عقد بقرية الكوبانية ، والسؤال الذى يطرح نفسة الان :

على من تتألف القبائل العربية ...... ؟ فهل تتألف على النوبيين ام تتألف ضد مصلحة مصر ...!

و بخاصة ان غالبية المدعويين لهذا المؤتمر هم فلول الحزب الوطني من نواب سابقين بمجلسي الشعب و الشورى و المجالس المحلية المنحلة و ذوي العلاقة الوطيدة بمحافظ أسوان ، و حيث ان اللجان التى تم تشكيلها وتم الموافقة عليها هى بمثابة حكومة ظل ونواة دولة داخل الدولة وهو الامر الذى نرفضه شكلا وموضوعا

3. كما ان ائتلاف شباب الثورة باسوان يحذر الشباب الثورى الذى خرج متحررا من الافكار الايدلوجية اوالعرقية او العنصرية او الدينية من خداع بعض القوى السياسية التقليدية والتى تسعى لاستقطابة من اجل المناورة بهم سياسة لوضع قوائم انتخابية تخدم مصالح هذه القوى بعيدا عن مسار الثورة الصحيح .

وفى النهاية

أن مصلحة مصر العليا الان فى التوحد ولم الشمل لاستكمال مسار الثورة واهدافها النبيلة ولا يمكن ان نقبل بالشتات والتقسيم والتجزئة لهذا الشعب.

عيش – حرية –عدالة اجتماعية

استقلال القضاء

2011-08-27T12:48:00.004+02:00

بسم الله الرحمن الرحيم
وَإِذَا حَكَمْتُم بَيْنَ النَّاسِ أَن تَحْكُمُواْ بِالْعَدْلِ إِنَّ اللّهَ نِعِمَّا يَعِظُكُم بِهِ إِنَّ اللّهَ كَانَ سَمِيعًا بَصِيرًا
صدق الله العظيم

من وجهة نظرى الشخصية قد يختلف معى بعض ويتفق معى البعض
استقلال القضاء يبدأ من كلية الحقوق وخصوصاً اننى خريجة كلية الحقوق بس كنت بليدة ومازلت ولكن لقد رأيت الكثير من التجاوزات فى اختيار وكلاء النيابة يعنى بمعنى اصح السلك القضائى طول ما فيه توريث لان ينتج لنا قضاه على قدر كافى من الحرية والجرأة والعدل فى اتخاذ الاحكام العادلة ويخشون الله ولا يخشون احداً غير الله

اولاً : لما يكون طالب فى كلية الحقوق لابد من منع القضاه تصحيح اوراق الطلبة حتى لا يجاملون بعضهم البعض وبرضو الدكاترة فى كلية الحقوق من المفروض ما يجاملش القاضى الفلانى ولا القاضى العلانى

ثانيأ: مينفعش يكون الاختيار بالواسطة اللى خربت كل شئ فى حياتنا وطبعا المبالغ الكثيرة التى تدفع لكى يمكنك الالتحاق بالسلك القضائى وبلاش يكونوا من النوع اللى بيحفظ ومش بيفهم اصل الناس الحفظية دى دايما بيكونوا تابعين وغير مستقلين فى قراراتهم

ثالثاً : يحرم طلاب كلية الشرطة من الالتحاق بالسلك القضائى لان تربيته البوليسية يختلف كثيراً عن طلاب كلية الحقوق

رابعاً : بلاش الدفعات التكلميلية اللى بتكون لأبناء المستشارين اللى هما غير متوفقين ومنتظرينهم يخلصوا الدور الثانى لكى يلتحقوا بالنيابة وبصراحة مش بيكونوا فاهمين اى حاجة لانى انا شوفت ده بعينى واعرف ناس كدة كانوا بيسقطوا وفى الاخر فى النيابة

خامسـاً: زيادة عدد القضاه بما يتناسب مع حجم وعدد سكان جمهورية مصر العربية حيث اننى ارى تأخر القضاه وعدم وجود عدالة فى الفصل بسبب قلة عددهم

سادساً: انا شايفة مع تعديل قانون السلطة القضائية لابد من وجود قانون يلزم القاضى بأحترام الوقت والبدء فى موعده

سابعاً: لازم الفصل بين السلطات وان القضاء سلطة مستقلة لها كامل الحرية فى الاحكام ولابد من حمايته

عـايزين ثــــورة فى كـــل شئ فى حياتنا

يلا بينا نرسم خريطة مصر الجديدة

اسفة على الاطالة وركاكة الاسلوب

الجنوب المنسى

2011-08-09T10:44:00.003+02:00

الجنوب المنسى قبل وبعد الثورة الناس هتقول قبل الثورة اه بس بعد الثورة اازاى ودى حكومة انتقالية اه
لما يكون هناك حركة محافظين والصعيد لا يوجد بها اى حركة ما معنى هذا الكلام انه فعلا منسى ولما يكون فى احداث دامية ولا قناة رسمية ولا قناة فضائية تهتم
حتى الشباب مهتمين بالصينة اللى فى التحرير والثورة فى اسرائيل وثم لندن والصعيد يحترق احداث دامية عاشتها جرجا وللاسف مازلت تعيشها حتى الان ولم نسمع اى عنها اى شئ وفى شخصية على توتير
@MidooDj
هو اللى كان متابع الخبر وانام واصحى الاقيه وهو بيحاول يعمل ريتويت بس للاسف كله بيهزر وبيضحك على المظاهرات فى اسرائيل ولا حد معبرنا ونعمل على رتويت على كل الهاشتجات برضو مفيش فايدة حتى ليلة امس لما يسرى فؤدة تكلم عن احداث جرجا وقناة الجريزة ومازال غياب القنوات الباقية
على الرغم ان حركات القطارات مقطوعة وبرضو ماحدش سأل فينا نفس اللى حدث فى قنا اعتصمواوقطعوا السكة الحديد وبرضو ماحدش افتكرهم اللى لما الموضوع كبر
قوليلى بقى هتلموا الاحداث فى جرجا ازاااااااااااااااااااااااااى

وداعاً محمد محــسن

2011-08-07T00:17:00.009+02:00

ان لله وان اليه راجعون

ان العين لتدمع وان القلب ليحزن وانا لفراقك يا محمد لمحزونون

لا اجد كلمات اقولها سوى

دمك فى رقبة الروينى اللى حرض الاهالى عليكم دمك فى رقبة المحرضين على المسيرة اللى بيستغل حب الشباب للوطن

وحماسهم ونفسهم يشوفوا وطنهم احسن الاوطان

حسبنا الله ونعم الوكيل

دمك فى رقبة الاطباء والمستشفيات اللى خليته ينزف لأكتر من 3 ساعات دمك فى رقبة اللى رمت الطوبة

حسبنا الله ونعم الوكــيل حسبنا الله ونعم الوكــيل

لقد رحل عنا اخونا محمد محسن كان شاب شهم مكافح محب لوطنه ناشط سياسى من قبل الثورة فى الجمعية الوطنية للتغيير محب للبرادعى من شباب ثورة 25 يناير

اسوان كلها بكت يا محمد ومازلنا نبكى لقد فقدناك اخ عزيز علينا جميع

ربنا يرحمك ياااااااااااارب آمــــــــــــين ويسكنك فسيح جناته ياااااااااااااااارب آمــــــــــــــــين ويصبر اهلك واحبابك يااااااااااااااااااارب آمــــــــــــــــــين

ادخلوا لصفحة محمد محسن

تحياتى لمصر الحبيبة و لشعب مصر الحبيب

2011-08-03T09:20:00.007+02:00

بسم الله الرحمن الرحيم ( قل اللهم مالك الملك تؤتي الملك من تشاء وتنزع الملك ممن تشاء وتعز من تشاء وتذل من تشاء بيدك الخير إنك على كل شيئ قدير ) صدق الله العظيم .

اللهم لا شمتة بس بجد هو ده العدل كل ظالم له نهاية اعلم يا من تظلم فلك يوم سوف

تذل فيه وتهان لانك اهنت وذليت كثيراً

كالعادة فى مؤيدين ومعارضين للمحاكمة انا مش هأقول ازاى فى ناس معارضة

للمحاكمة براحتهم هما شايفين انه هو ابوهم بس انا على نفسى وراى المؤيدين للمحاكمة انو مش ابويا ده ابو جمال وعلاء وكانت امنتى ان امى تخلغه والحمدلله امى

خلعته الحمدلله الحمدلله

انا عايزة اقول للناس اللى بتقولى انى شمتانة انا مش شمتانة فى حد والله انا بحب مصر وبأموت فى ترابها وبحب اهلها وعلى يقين ان الجرائم اللى فى مصر سبب الظلم ولو كل واحد اخد حقه اكيد هيخاف على بلده

وكمان فى حاجة مهم مصر عملت ثورة هنحافظ ازاى عليها بالمحاكمات لان كل رئيس قادم كل وزير قادم كل ظابط كل دكتور كل قاضى قادم كل محامى قادم كل الشعب هسيحاكم حين يخطأ

تحياتى لمصر الحبيبة و لشعب مصر الحبيب

بجد بجد هأطق

2011-07-05T12:37:00.002+02:00

انا بجد هأطق و مبقتش عارفة ولا فاهمة فى ايه فعلا احنا رجعنا تاااااااااااااااانى لورايا وكمان بالجامد اووووووووووووووووى
يعنى ايه امبارح اخلاء سيبل المتهمين بقتل المتظاهرين والنهاردة براءة بالجملة
يااااااعينى يااااااا عينى
احنا محتاجين محاكمات ثورية حتى لو هيقولوا علينا مش ديمقراطين مع السلامة الديمقراطية فى ظل الفساد يرجع تااااااااااااااااانى احنا محتاجين البلد نضف بجد احنا مش محتاجين مساحيق لالالالالالا محتاجين مية نااااااااااااار عشان اللى يتأكل مع السلامة واللى يحترم نفسه وينضف ينضف
انتظرونا الجمعة القاااااااااااادمة
جمعة الغضب الثانية

مش لاقية عنوان اكتبه

2011-06-30T01:23:00.004+02:00

انا مش عارفة انا مين ولا انا تبع مين مخى تعب نفسى مصر واهلها يكونوا فى احسن حال ونجوم التليفزيون يرحمونا شوية عشان انا تعبت سواء بتوع الدستور اولا او الانتخابات اولا ما كل واحد وله ناسه وقنواته ومؤيديه ووسط دا كله ناسين اهم شئ الناس الغلابة
والله قلبى اتوجع من يومين لما روحت استقبال المستشفى العام مفيهاش جهاز قياس ضغط الدم وكمان بيضحكوا على الناس عشان الناس غلابة ومش عارفه حاجة وياريت حد فيكم يجرب يروح مستشفى او يعرف حد مش لاقى تمن علاجه وسبحان الله الناس الغلابة دول تلاقى فيهم كل الامراض اكيد ربنا له حكمة
ولى سؤال للنجوم هنفضلوا كدة لغاية امتى ؟؟؟؟
لازم يا جماعة نخلى بالنا من حاجة مهمة اوووى ان الناس الفقيرة والله كانوا فرحانين اووووووى بالثورة بس للاسف بدأو يكرهو الثورة ان عارفه الثورة مش هتعمل حاجة بين يوم وليلة بس للاسف الناس دى متعرفش كدة ولا هتفهم كدة لانهم بجد محتاجين اووى واسوء حاجة فى الدنيا الحاجة وانك تتحوج للناس وكمان للاسف مش هتلاقى حد يساعدك!!!
وكمان عايزة اقولكم حاجة لبتوع الاحزاب اللى بيجمعوا توقيعات وبيعملوا مؤتمرات بيدفع فيها فلوس بالعبيط والناس مش لاقية فى المستشفيات اجهزة لقياس ضغط الدم ولا السكر وكمان من المفروض يكون معاك ترمومتر ويا سلام لو هتنزل فى المستشفى عشان تاخد كام يوم تتعالج مش هتلاقى سرير ويا حبذا و لو هتعمل تحليل وما ادراكم بالتحليل وتمنه يا تنتظر يومين او تلاتة عشان ياخدوا العينة يعنى يكون جالك مرض تانى على اللى عندك من كتر الانتظار وسوء الخدمة دة بس كدة فى مشكلة العلاج
شوفوا بقى الاكل والشرب والحياة اليومية
انا عارفة الناس هتقول احنا فى ايه وهى بتقول ايه لازم نخلى بالنا من الناس دى عشان بكرة هتتقلب علينا وعلى الثورة وللاسف ممكن كمان تترحم على ايام مبارك
بجد بجد عندى احباط وحزينة اوووى امتى حالنا هيتعدل
سامحونى على ركاكة اسلوبى بس بجد حزينة اووووووى

مصرف السيل " ترعة كيما "

2011-06-25T08:22:00.004+02:00

مصرف السيل هو المصرف الخاص بمسار السيول لتفادى اضرارها وهى الغرق تم أنشاء المصرف فى الستينات من اجل هذا ولكن مع مرور الزمن تحول الى مصرف للصرف الصحى بدون معالجة واقيمت عليها جريمة اكبر وهى التغطية لأبعادها عن انظار الناس ولكن مازال مياه الصرف تجرى أسفل المصرف والتغطية التى بدأت تقريبا فى 2003 ايام المحافظ السابق سمير يوسف هو اول من بدأ بهذه الجريمة وحتى الان وبعد مرور سبع سنوات على التغطية بمراحلها الخمسة التى تكلفت 23 مليون جينه تقريبا وأقامة مشروع ضخم ممشى اسوان الدولى " خان اسوان " ومياه الصرف الصحى الغير معالج اللى هى فى الاساس مياه الصرف المعالج لا تصلح للزراعة فما بالكم بالشرب ؟؟؟؟؟
مياه هذا المصرف يمشى موازى للشاطئ بمسافة عشرة كيلو متر تقريبا يعنى كل قرى ابوالريش قبلى بتشرب مياه صرف لان اكيد محطة شرب ابو الريش ليس بها الامكانيات والمواصفات العالمية لتنقية المياه وللاسف الشديد اغلب اهالى ابو الريش يعانون من مرض الكبد والفشل الكلوى والامراض السرطانية التى بدأت تظهر بشكل مفاجئ وغريب
واليكم الفيديو الذى يوضح هذه الجريمة

ساعدونا فى الحملة

الحملة الشعبية لحماية نهر النيل من التلوث 1

2011-06-02T01:51:00.002+02:00

المرة دى انا جايبة فيديو لمنظر الصرف فى النيل مباشرة بدون معالجة على الرغم اللى اعرفه من خلال القراءة عن موضوع المية اصلا مينفعش حتى الزراعة بمية الصرف الا الغابات الشجرية يعنى حياتنا كلها ملوثة وربنا يسترها علينا
وللاسف كنت معتقدة ان مية اسوان انقى مية وانى بأشرب مية حلوة ونضيفة لغاية ما عرفت ان المصرف ده تقريبا كدة كل محطات الصرف بتاعت اسوان بترمى فيها فى الاخر والكارثة الكبرى انهم غطو المصرف ده عشان المنظر طبعا ومية الصرف برضو بيجرى تحته
شاركونا فى الحملة

الحملة الشعبية لحماية نهر النيل من التلوث

2011-05-28T21:39:00.002+02:00

ممكن الناس تقول فى ايه ما فى حاجات وموضوعات اهم من الكلام ده وانا من وجهة نظرى كله مع بعض احنا بنبنى مصر يبقى لازم مصر تتبنى سيلمة وصحيحة عشان انا بصراحة تعبت من التلوث واللى السبب الرئيسى فيها الفســاد فى كل شئ وخصوصاً عدم تفعيل القوانين وكل الناس فوق القانون وانا شايفة واحنا بنبنى مفيش حد فوق القانون
الموضوع مهم جـــــــــدا هو حماية نهر النيل
الحملة الشعبية لحماية نهر النيل من التلوث
الناس هتسأل ممكن نساعد ازاى من وجهة نظرى نبدأ احنا الافراد ونشغل وزارة البيئة
1- اتمنى من الجميع رصد اماكن التلوث بالصور او المعلومات ومن المسئول عنه ( محافظة - مصنع - اشخاص ..وهكذا)
2- نحرك وزارة البيئة ونجبرها على التحرك وتفعيل القانون واى حد بيصرف على النيل نطالب بوقفه على اساس مددة زمنية محددة
لان بصراحة صحتنا فى خطر وفواتير العلاج كبيرة جدا وكمان احنا زعلانين على حصة المية وللاسف احنا مش بنحافظ على اللى عندنا بنلوثها وبنهدرها
اتمنى الموضوع يلاقى صدى عندكم
سامحونى على ركاكة الاسلوب

يااااااااااااااارب احفظ مصر

2011-05-09T03:13:00.002+02:00

يا مصر ولادك خذلوكى
انا قلبى موجع اووووووووى على اللى بيحصل
فى ايه حـــــــــــــــرام عليكم ارحـــــــــــــموا مصـــــــــــــر
لو بتحبوا مصـــــــــــــــــــــــــر
افهمـــــــــــــــوا بقى كلنا فى مركـــب واااااااااااحد يا تسير يا تغرق اعوذ بالله
ارحمــــــونا بقى فى ايه
انتو عايزين امن الدولة تاااااااانى صــــــح
انتو عايزين الناس تترحم على ايام مــبارك
دى مؤامرة كـــــبيرة
يااااااااااااااااااااااارب احفظ مصر والمصرين من كل سوء ورد كيد الكائدين ياااااااااااااااااااااااارب امــــــــــــــــــين

احنا الاسوانية هنرحل القناوية

2011-04-20T01:03:00.002+02:00

انا عارفه القناوية من حقهم التظاهر ولكن وليس من حقهم قطع الطرق هنقول قطعوا الطريق عشان ماحدش سال فيهم الا لما قطعوا الطريق بس برضو حرام عليكو
بس هو فى ســؤال الاعلام مش ناوى يتغير ولا ايه ؟؟؟؟انا بقى ألوم على الاعلام طبعا بكل وسائله هو مفيش حد فى الجمهورية غير القاهرة امتى النظرة دى هتختلف ولا مش ناوين انتو كمان تتغييروا يبقى قولولنا عشان ننسى انه فى اعلام من اساسه سواء القطاع الحكومى او حتى الخاص
نيجى بقى للمسؤلين اذا كنتم هتتعاملوا بنفس النهج القديم التأخرفى اداراك المصائب فأننى ابلغلكم انكم سوف تلاقوا نفس مصير السابقين
نيجى بقى للقناوية ارحمونا مفيش حد بعدكم غيرنا افهموا ده
ولا احنا كمان نرحل بقى القناوية اللى فى اســوان يعنى عشان يمكن تفهموا يعنى لو الحكاية عافية افهمـــــــــوا احنا بس اللى مضرورين فى القصة دى ولا هو اسلوبنا هيكون مظاهرات نقطع الطرق ونشتغل بقى شغل ولاد ليل
ارحمــــــــــــونا يا قناوية
احنا الاسوانية هنرحل القناوية
بـجـــــــد بقى يا قنــاوية حرام عليكم

بختنا مايل فى المحافظين

2011-04-18T01:59:00.004+02:00

انا بأتفائل بمدونتى فى المحافظين كنت كتبت على المرحوم سمير يوسف اتغير الراجل وبعد كده رحل من الدنيا كلها الله يرحمه اذكروا محاسن موتاكم
مش عارفه ليه بختنا فى المحافظين مايل
اصل كل المحافظين اتغيروا الا محافظنا مصطفى السكرة انا مش فاهمة فى ايه هو احنا مش تبع الجمهورية ولا ايه هو انتو اخدتوا اسوان هدية على الجمهورية ولا ايه يا جدعان مش هو فى ثورة ولا بيتهألى
المحافظ لازم يمشى اوعو تكونوا فاكرين الامن اللى فيها اسوان منه لالالالا طبعا احنا نعرف بعض فى اسوان عشان كده الوضع الحمدلله مستقر حتى الايام اللى مكانش فيها شرطة الوضع جميل جدا وهادى وكان فى مظاهرات فى الميدان بالالف المحافظ الكداب يقول 200 واحد امـشى بقى كفاية عليك بوابات لحد هنا احسن تتعلق فى واحد فيهم
وكمان القناوية زودا علينا قطعين الطريق علينا هو فى حد بعدكم يعنى غير الغلابة الاسوانية الطيابة وقطعين والاسوانية دول جيرانكم مش كفاية غيروا كل المحافظين الا احنا
ليا سؤال هو احنا مش تبع الجمهورية؟؟؟
لك الله يا اســـــــــــــوان

ايــــن الاستقرار مع نعم

2011-03-18T23:10:00.003+02:00

بصراحة انا مخنوقة اوووى ومضايقة اكتر لاننا كل شوية نرجع لورا من تانى

ونرجع من اول السطر ونشتغل نخون بعض انا مش خاينة ولا عميلة ولا اجندة ومش مذنبة ومش عاصية

نفس السيناريو تانى بعد خطاب مبارك عشان الاستقرار وصالح البلد الراجل يقعد الــ6 شهور

وبرضوساعة شفيق برضو يقعد ده كلها شهور وهو تسير اعمال يا جماعة

احنا بنقول اسقاط النظام يعنى النظام يسقط بحكومته ورموزه ودستوره

وكمان دلوقتى لما قولنا نغير الدستور والاعتراف بالثورة معناها يبقى تغيير الدستور قالوا لينا برضو الاستقرار

اى استقرار فى ظل انتخابات شعب وشورى ورئاسة وبعد كده استفتاء على الدستور الجديد اللى من المفروض هيتعمل ده طبعا ازاى اتعمل

وبعد كده برضو الدستور القديم يسقط ويسقط معاه الرئيس ومجلسى الشعب والشورى وكل انتخاب فيهم هيكلف الدولة 70 مليون جينه هل الدولة مستحملة كل الملايين دى فى انتخابات

ويبقى السؤال

ايـــن الاستقرار؟؟؟

بجد بجد اعصابى تعبانة وانا مش خاينة وانا مش ضد الاستقرار وانا مسلمة الحمدلله وبأقول لالالالالالالالالالالا للتعديل

افتكرلك ايه يا حسنى

2011-02-07T01:23:00.002+02:00

على راى المثال اللى بيقول افتكرلك ايه يا بصلة وكل قطمة بدمعة

يعنى مفيش حاجة حلوة افتكرها الناس هتقول ازاى حررررام عليكم

خلاص هأفتكر عمل كتير بس باللى عمله خلال الــ13 يوم يمسحلك كل اللى اتعمل الناس هتقولى انى مفترية مش مشكلة الناس هتقولوا انتو كدة طماعيين ما عمل اللى انتو عايزينه لالالالالالالالالالالالالالالالالالالا لو سمحتوا

ركزوا معايا هو عمل اللى هو عايزاه وبـــس

بالدليل خرج الناس فى كل محافظات مصر الا القليل منها حتى لو كان المظاهرات متواضعة ولكن تدل على ان الشعب طلع ومفيش حتى تصريح واحد من حكومته

ويوم 26 خرج الناس مجددا للتظاهر برضو مفيش اى تصريحات

يوم 27 خرج الناس لليوم الثالث على التوالى وبرضو مفيش اى تصريحات الا تصريح حبيب العادلى تصريحات وزارة الداخلية هى تصريح الحكومة المصرية كاننا لامؤاخذة كلاب فى الشوارع يعنى الكلاب تعوى والقافلة تسير ماشى على هذا المنهج

من عيشية 28 انقطاع النت عن الجمهورية والشبكات المحمولة عن اغلب المحافظات الله عليكى يا حكومة

ويوم 28 فعلا كان يوم الغضب على مستوى الجمهورية حتى فى محافظتنا خرج اكثر من عشرة الاف متظاهر غير باقى المراكز وكان يوم دامى كاننا فى حرب ولا ليست مظاهرة

وثم بعد القتل والحرق يخرج علينا السيد المبجل رئيس الجمهورية بتصريحات عبيطة كان ممكن ينفع يوم 25 او 26 او حتى 27 ولكن يوم 28 بصراحة كلالالام فاضى

ومع ضغط الشارع وخروجهم اليومى للميادين يخرج علينا برضو متاخر وما يعملش اللى الشعب عايزه طلع يتكلم عشان يكسب تعاطف الشعب اللى دايما بيضحك عليهم وفعلا ضحك عليهم ولكن الله فضحه وفضح نظامه وانه يجب ان يرحل وكل من معه

ولكم موضوع من مدونة ماعلينا وبأضم صوتى لصوته

http://ma-3lina.blogspot.com/2011/02/blog-post.html

احنا عايزين فلوسنا يا حكومة

2010-12-06T19:33:00.003+02:00

الانتخابات ما هى الا سيما بايظة وسخيفة ومضيعة للوقت واحنا عايزين فلوسنا من الحكومة طب ما كان من الاول عينهم وارتحنا ومش اتعطلت مصالحنا وفلوس الدولة دى اللى بتتصرف كل شوية فى حاجات هبلة ولا ليها اول ولا اخر

من حقنا نعرف ادفع كام فى الانتخابات طباعة ورق واجازات للموظفيين وانتقالات والكل فى الاخر خسران

طب ما كان الصحة ولا التعليم اولى بالفلوس دى ولا السلع اللى كل يوم بيغلى بدون مبرر وماحدش عارف فى ايه

والله الواحد مخنوق اووووووووووى فوق ما حد يتخيل نصب واحتيال وتزوير وسرقة وفى الاخر مين اللى خسران مفيش غيرنا احنا الشعب المغلوب على امره

احنا عايزين فلوسنا يا حكومة

التميز باللون فى الحزب الوطنى

2010-11-26T14:33:00.002+02:00

وحشتنى يا مدونتى واحشنى كل المدونات واحشنى التدوين نفسى من زمان ارجع بس مكنتش عارفه ارجع ازاى وبموضوع ايه ارجع فالحمدلله لاقيت موضوع
اين نذهب نحن اصحاب البشرة السمراء
حتى فى محافظتنا المحبوبة وحضنها الدافئ لم يعد لنا مكان فيها وذلك بسبب لونا الاسمر وهذه حقيقة ولكن حقيقة مرة اننا ننعانى من التمييز منذ زمن وليس لنا وجود فى شتى المجالات الا القليل حتى فى التليفزيون المصرى اخرهم الاذاعة وحتى المناصب ومادة خصبة للتريقة على لونا فى المسلسلات والافلام وموخراَ الانتخابات والا وهى مقعدى الكوتة وهى مقعدى للمرأة فقط اننى فى قمة الحزن تم اختيار اثنين لسيت من بنات اسوان فقد تم الاختيار من قبل السيد خلف سعيد الامين العام للحزب الوطنى بأسوان لكى يكون مرشحتى الحزب رقم واحد لعبير وهى اصولها من المنيا والثانية لفردوس وهى من محافظات الدلتا فقط تم اختيارهن على اللون واشياء اخرى على العلم ان عبير لا تصلح تكون وجه اسوان حتى لو تمتلك الكثير من المال لان ملفاها غير مشرف لبنات اسوان ومن تكون فردوس وللاسف لم يتم اختيار اى سيدة من سيدات اسوان لان الثالثة الدكتورة هدى ويقال عنها انها من قبائل الاصولية والرابعة وهى التى تتعبر من بنات اسوان بالفعل ايمان سعد عرفة
كيف تم الاختيار
اين نذهب نحن الاسوانين ؟؟؟؟؟؟؟؟؟؟؟؟؟؟
اننى فى قمة الاسفة على ركاكة الاسلوب ولكننى من شدة حزنى لا اعرف ماذا اكتب
ولنا الله

تحـــــــــــية كــــــــــــــبيرة

2009-06-23T20:44:00.009+03:00

تحية لأبطال مصر على المستطيل الاخضر
تحية لجهودكم تحية لكم جميعا
لا احد منا يمكنه التقليل منكم رغم الهزيمة لان مفيش حد منا تعب زيكم ولا احد منا كان تحت الضغط والارهاق اللى كنتم فيه ولا احد منا تعب زيكم
تحية كبيرة ليكم
وربنا معاكم فى التصفيات

متغاظة

2009-05-24T21:18:00.003+03:00

السلام عليكم ورحمة الله وبركاته
ازيكو عاملين ايه ياااااااارب الجميع بخير
ماحدش يضايق من كلامى ولا يتغاظ ولا اى شئ معلش بقى استحملونى لانى اكيد باقول اللى جوايا واكيد اكيد متغاظة
المهم بقى انى متغاظة وزعلانة على الاسماعيلى وكان نفسى الاسماعيلى يفوز معلش يا اسماعيلى ومش بحبكم يا اهلاوية خاااالص وبصراحة بصراحة بحس الاهلى يهود مصر ماحدش يضايق
وكمان زعلانة على ابن اخويا اللى قاعد ياعينى يشد فى شعره هو اينعم سنه خمس سنين بس الواد متعصب اوووى وحزين اووى
وليه الاهلاوية فرحانين كده ده طبعا ظاهرة غير صحية للكرة المصرية انكم دايما تفوزوا
ياريت بقى تعدوا بمصر لكاس العالم يا اهلاوية اللى انتم بتقولوا انكم المنتخب خلينا نشوف بقى انجازاتكم علشان نفوز بالكاس وهنديكم الدورى بالتزكية بدل تعب الفرق وشراء لاعيبة ووجع قلب الجمهور
ماحدش يضايق انا متغاظة وزعلانة بس

الظلـم

2008-09-15T23:17:00.007+02:00

اننى اكرهك يا حسنى واكره عصرك نفسى اشوف حد تانى غيرك

انا عارف انك مش بتحكم دلوقتى ليه مش سبتها من بدرى علشان كنا على الاقل نتذكرك بحاجة كويسة

كل شئ حوالينا بقيت وحشة

انا عارفه الناس وحشة علشان كده انت وحش معانا بس برضه انت اوحش مننا بكتير انت ورجالك

كل يوم مشكلة كل يوم ازمة و مصيبة و المصائب فى كل حتة

شئ يخنق مصر ماشية على ازمات ومصائب وللاسف كلها للغلابة اللى دمهم اتمص منك ومن رجالك

احنا اتعودنا ان فى فرق وفى محسوبية وفى فرق ومفيش عدالة اجتماعية

اللى حاليا انا مش عارفه ايه مفهومها عند الحكومة وهذا النظام الفاسد بكل المقاييس

احنا اتعودنا ان فى تفرقة فى الخدمات بين القرى والمدن بس بيكون بالشكل الفج ده يبقى ظلم كبير

مش علشان ساكتين يبقى خلاص نديهم على دماغهم كل شئ

لا والله بنتكلم وصوتنا راح من كتر الكلام

ماحدش عايز يسمعنا

هو مفهموم القرية ايه عندكم؟؟؟

ناس بتنام من بدرى طبعا زى الفراخ اللى عندهم فى بيوتهم ومش عندهم ثلاجات وبياكلوا من الغيط والكلام ده ايه هو انتم هبل ولا ايه

الدنيا اتغيرت والدنيا صيف يعنى الحرارة مرتفعة يعنى الحرارة اتعدى الاربعين عندنا يعنى الاكل هيوبظ اللى الناس بتجيبه بالعافية

يعنى الدنيا رمضان مش عارفين نفطر زى خلق الله

الجوامع نار مش عارفين نصلى التراويح

حرام بقى افسدتوا كل شئ فى حياتنا

الحرارة عندنا مرتفعة كل قرى اسوان موجودة جوه الجبال وفى الصحرا يعنى عقارب اللى عمرك ما شوفته ولا هتشوفه بيزيدوا فى ارتفاع الحرارة بيزيدوا مع قلة الكهربة والاضاءة

هنعالج الناس ازاى لو حد لقدر الله اتلدغ هنعمل فيهم ايه طبعا يموتوا علشان نخفف عدد السكان

قرى اسوان تقع على الطريق السريع طريق مصر اسوان وسكة حديد مصر يعنى حوادث بالكوم انا عارفه احنا مالناش قيمة

بس الكهربة تكون طالعه من اسوان وتقطع دى بقى اسمه ايه

انا عارفه ان الكهربة تقريبا بتقطع عن كل قرى الصعيد فى نفس التوقيت

ما التفسير

مفيش مسئول عايز يرد

يعنى ايه

؟؟؟؟؟؟؟؟؟؟؟؟؟؟؟

اللهم تقبل منا رمضان

2008-09-05T21:27:00.003+02:00

الزمالك والاهلى

2008-07-08T13:33:00.007+03:00

فى البداية انا زملكاوية يعنى ماحدش يدخل يغلط فى الزمالك ده مش تحذير :)) ده لفت نظر اصلى بجد هأزعل على

الزمالك

وعلى فكرة جمهور الزمالك من المفروض ياخدوا جائزة احسن جمهور فى القرن لانهم صابرين

والحمدلله ربنا كرمنا واخدنا الكاس وان شاء الله الانتصارات قادمة

ادخل فى الموضوع بقى

ان شايفة ان الاهلى والزمالك افسدوا الكرة المصرية بسبب حرب شراء اللاعيبين وبجد بيفسدوا الدورى نفسى اشوف دورى قوى محترم حرام عليكم تشتروا الاعيبة وتخلوا باقى الفرق بدون لاعيبه

طبعا هتقولوا هما عايزين يروحوا النوادى دى لاطبعا مش اوووى كده لانه اول ما بيروح بيقعد اغلب الوقت على دكة الاحتياط حرام حرام حرام اللى بيحصل ما عندك لاعيبه كتيرة استغلهم والعب بيهم كلهم مش تزود عددهم وخلاص علشان تاخد الصفقة من النادى الفلانى انا شايفة فى لاعيبة كتيرة كان مستواهم فوق الممتاز للاسف الشديد راحوا الاهلى وخسروا كتير وبرضو منهم راحوا الزمالك وبرضو خسروا كتير ليه العند والمكابرة فى كل شئ

نفسى اشوف الدورى المصرى زى الدورى الاسبانى نفسى اشوف الدورى بتاعنا زى الدورى الانجليزى كاس عالم ايه اللى ناويين تدخلوه انا بقى بأقولكم مش هتشوفها طول ما فى الاهلى والزمالك بالانانية دى

نفسى اشوف مصر متقدمة شئ واحد نفسى اشوف مصر كويسة نفسى اشوف الناس كويسة الواحد تعب من الحاجات اللى بتحصل

ارحمونا بقى

لا داعى للكآبة

2008-07-04T20:50:00.001+03:00

انا ليا فترة مش قادرة اكتب ومش عارفه اكتب ايه ومشغولة ومخى فاضى كالعادة ورخامة منى انى اقفل التعليقات بس والله غصب عنى لانى بأشوف التعليقات ومش بأقدر ارد ولا اتابع حتى المدونات ارجوا من الجميع ان تسامحونى لان الظروف اقوى منى

فى البداية

أسالكم الفاتحة للفقيد عبد الوهاب المسيرى ربنا يرحمه رحمة واسعة

عايزة اقولكم على حاجة بلاش الحزن والكآبة ولا احد يبكى على ماضى لانه خلاص ذهب دون رجعة والمستقبل الله وحده يعلمه مين قالكم ان الحاجة اللى شايفينها حلوة او انك معتقدين انها حلوة ممكن يكون مش حلوة لانها من ظاهرها حلوة بس من جواها علقم

على فكرة الكآبة بجيب كآبة والحزن بجيب حزن

حدثنا أبو بكر بن أبي شيبة حدثنا وكيع عن شعبة عن سعيد بن أبي بردة عن أبيه عن جده أن النبي صلى الله عليه وسلم بعثه ومعاذا إلى اليمن فقال يسرا ولا تعسرا وبشرا ولا تنفرا وتطاوعا ولا تختلفا

واكثروا من الاستغفار وكونوا على يقين بأن الله سبحان الله وتعالى قادر على كـل شئ

اصعب شئ

2008-06-13T20:05:00.006+03:00

اصعب شئ تجد من يحتاجك وانت بعيد عنه ولا تقدر على مساعدته
اصعب شئ حينما يكون اقرب الناس اليك فى حاجة لا تقدر على مساعدتهم
اصعب شئ قلة الحلية وتقف مكتوف الايدى امام افعال وتصرفات لا ترضى عنها
اصعب شئ حينما تكون بحاجة لصديق ولا تجده
اصعب شئ تشوف الافعال غير الكلام الذى يقال

اصعب شى انك تحب حد وفى النهاية تكتشف انه لا يستحق

اصعب شئ حينما ياتى الغدر من اقرب الناس لك
اصعب شئ تعطى وقتك لكل الناس وحينما تحتاج انسان منهم لا تجده
اصعب شئ تساعد كل الناس ولا تجد من يساعدك
اصعب شئ تسأل عن كل الناس ولا تجد من يسأل عنك

اصعب شئ حينما تفقد صحتك ولا تقدر على فعل شئ وانت فى امس الحاجة لها

اصعب شئ حينما يكون الوقت معك ولا تجد ما تفعله وحينما تجد ما تفعله ولا تجد الوقت

اصعب شئ حينما تجد نفسك وحيدا

لنا الله والحمدلله على كل حال واعوذ بالله من حال اهل النار
لا حول ولا قوة الا بالله العلى العظيم
يا حي يا قيوم برحمتك استغيث اصلح لي شأني كله و لا تكلني الى نفسي طرفة عين

انا العبد للشيخ محـمد حســان

2008-05-13T13:37:00.001+03:00

هيه هيه الريس ضحك علينا

2008-05-06T16:08:00.005+03:00

اه والله بجد ضحك علينا علشان شايف مش بتفرق معانا قال ايه عمل علاوة فين العلاوة دى انا مش عارفه بصراحة اقول ايه غير ان دماغى خلاص هيضرب اذا ماكنش اصلا ضـرب

حد فاكر القصيدة

بتاع اليساريين ايام احداث 77 انا مش فاكرها كويس لانى قرايته من بدرى اووى بس اهو محاولة انى افتكرها

مــش كفاية لبسنا الخيـش

جايين ياخدوا رغيف العيش

يا حكومة الوسط وهز الوسط

كليو اللحم بقه بالقسط

يا حرامى ( سابقاً الانفتاح )الاستثمار الشعب جعان مش مرتاح

هما يشربوا وسكى ويكلوا فراخ

والشعب من الجوع اهو داخ

هما يلبسوا اخر موضة

واحنا نسكن عشرة فى اوضة

--------------------------------------------------------

ولا املك الا انا اقول هذه الدعوة المحببة الى قلبى ودعوة الحبيب المصطفى صلى الله عليه وسلم حينما اشتد عليه العذاب والاضطهاد من لنا غير الله هو الذى يرحمنا ويكفلنا ويخفف عنا

اللهم أشكو ضعف قوتى ,وقلة حيلتى وهوانى على الناس , يا أرحم الراحمين , الى من تكلنى إلى عدو يتجهمنى أم الى
قريب ملكته أمرى ؟ إن لم تكن ساخطآ على فلا أبالى غير أن عافيتك أوسع لى. أعوذ بنور وجهك الكريم الذى أضاءت له السموات والارض وأشرقت له الظلمات وصلح عليه أمر الدنيا والآخرة - أن تحل عليا غضبك أو تنزل على سخطك ولك العتبى حتى ترضى ولاحول ولا قوة إلا بك

آمـــــــــــــين آمــــــــين آمـــــــين

ياااااااااااااارب كــن معانا ولا تكن علينا يااااااااااااااااااارب آمـــــــــــــــين

ياااااااااااارب ارحمــنا من عنــدك يااااااااااااااااااااارب

حســـــــــــــــــــــــبنا الله ونعــم الوكـــيل

من اراد الامن والامان فلياتى الى اسوان

2008-05-04T15:46:00.007+03:00

السلام عليكم

طبعا كالعادة وبنفس والاعتذرات اللى عفى عليها الزمن

وحشتينى يا مدونتى يا حبيبتى وحشانى المدونات اووووووووووووووى نفسى انظف المدونة من الغبار ونفسى اعمل نيولوك يمكن نفسى تتفتح على الكتابة والعودة من جديد

وادينى اهو بأشحت على المدونة بتاعتى من له فى التصميم فليتكرم مشكوراً بعمل تصميم لذيذ يمشى معايا وياريت يكون روش طحن يجمع كل شئ يعنى المصرى الاصيل والاسوانى الطيب والجنوبية المغلوبة على امرها معلش بقى اصلى خلاص هأفطس من الغيظ والغلب فعايزة تجديد اشحت تانى ولا كفاية على فكرة هيكون مدفوع الاجر كيس دوم مطحون ومعاه كيس كركدية وكيس تمر هندى طبعا الكل بيسأل اشمعنى يعنى مشروبات اصلى عاملة حساب ان الدنيا صيف بقى وعايزين نفعل المقاطعة وماحدش يشرب الكولا والمياه الغازية اللى بتجيب بلاوى زرقا ومن هنا دعوة للعودة الى الطبيعة

طبعا لغاية دلوقتى يا مساء الغلاسة مفيش اى علاقة بين الكلام المكتوب وبين العنوان

ماحدش يستعجل اصل احنا دلوقتى فى موسم اضرابات وطبعا اسوان حبيبى هـدوء

لا اضراب 6 ابريل ولا اضراب 4 مايو ولا اى شئ يذكر بيفرق معانا هههههههه

ناس نفسها خضرا بشكل غير عاااااااااااادى سبحان الله اللهم ادمها علينا نعمة الهدوء قد ايه شعب مسالم

قــولوا بســــــم الله مشــاء الله

طبعا اسوان كده مش من فراغ لا ابداًظروف البلد مختلفه عن اى بلد تانى لانها سياحية والمصنع اليتم الموجود فى اسوان مصنع واحد بس مش بتكلم عن المراكز وعلى فكرة معرفش مرتباتهم بالظبط ايه وحتى لو مرتباتهم مش كويسة الناس برضو مرتاحة لان عندهم اتوبيسات خاص بهم والكهربا عندهم مجاناً يبقى بقى هنتكلم ليه لان الحكومة عندنا رفعت ايدها عن البلد من بدرى

طبعا مش هننسى عيد ميلاد الريس حبيب الملايين بس مش عارفه هل هو حبيب الملايين

بس ربنا يهديه علينا مفيش غير كده اقدر اقوله

وايه حكاية العلاوة ياترى الحكومة هتجيب الفلوس منين ؟؟؟!!!! اكيـد الايام اللى جايه حتجاوب على السؤال ده

ياريت ماحدش يجى عندنا اسوان لان ده كلام ومش كل اللى أقوله تصدقوه

معـلـــش بقى طالبة معايا غلاسة

معلش بقى بوست على الطاير

لا قصدى غلاسه على الطاير

اهيمة المحليات

2008-05-04T12:56:00.001+03:00

بسم الله الرحمن الرحيم

بناءاً على طلب الاستاذ محمد عبد المنعم حاولت شرح المحليات ولكن يبقى فاضل جزء من السؤال الخاص بالمرأة هأرد على حضرتك فى التعليق وكمان علشان خاطر الباشمهندس ما علينا اللى مقاطع النظام بأكمله لازم تشارك صوتك امانة لان صوتك هيرحوا هيرحوا

المحليات لاتقل اهيمة عن الشعب والشورى على الرغم الصورة اختلفت فى ظل نظام فاسد قلب كل شئ فى مصر ونجح النظام فى ارهاق نائب وعضو الدائرة الانتخابية فى مجلش الشعب لتلبية احتياجات اهل الدائرة حتى لا يدرك ماذا يحدث داخل المجلس الموقر وتمرير القوانين لانه مرهق بمطالب الشعب على الرغم ان هذه الاشياء من مهام واعمال المجالس المحلية والشعبية وهى من المفروض المسئولة امام اهالى المنطقة والمجلس المحلى هو المسئول عن توصيل مطالب الحى او القرية او المحافظة بأكمله من حق اعضاء المجالس المحلية المشاركة مع المحافظة فى خطة التنمية لانهم هم الاعلم بمطالب واحتياجات اهالى المنطقة

وليا رجاء اوعى تضيع صوتك وحاول تختار لازم نختار لان ده نقطة البداية

واللى يعرف عن المحليات اكتر واسلوبه افضل فى توصيل المعلومة يبقى
يتفضل ويكتب لنا حتى نعرف حقوقنا وواجباتنا

اهيمة الادارة المحلية من محاضرة نظام الادارة المحلية للاستاذ/ عبد الباسط شلبى

* التنمية الاقتصادية على مستوى الدولة هى محصلة كمية ونوعية الجهود فى المحليات التى تكون اجزاء الدولة

* التحولات الثقافية والسياسية التى تحدث فى القرى والمراكز فى المحليات تعتبر ركيزة للتطور السياسى على المستوى القومى

* مسارات الانتخابات المحلية , خاصة فى النظم الحزبية تعتبر الاساس فى التخطيط لعملية الانتخابات القومية ككل

* ان مردود العملية السياسية القومية لا يشعر به المواطن الا من خلال تعاملة مع الوحدات المحلية بأجهزتها المختلفة وبالتالى فانتقييمه لما يحدث من إصلاح وتقدم يتأسس على ما يلقاه من خلال هذا التعامل

* ان رضى المواطن عن أداء الوحدات المحلية هو مدخل لشرعية النظام ككل

* أن اصلاح نظام الادارة المحلية هو الضمان الحقيقى للتنفيذ الفعال للسياسات العامة للدولة وأن المشاركة الشعبية على المستوى المحلى هى الركيزة الاساسية للعمل السياسى على المستوى القومى

*أن انخفاض نسبة المشاركة بصفة عامة على المستوى المحلى يفقد , الى حد ما المجالس المنتخبة شرعيتها القانونية

أهداف نظام الادارة المحلية

أولا تطبيق النظام الديمقراطى وذلك من خلال قيام جموع الناخبين فى نطاق كل وحدة محلية باختيار ممثلين لهم يختارونهم بارداتهم الحرة انتخابا مباشرا وحراً وينوبون عنهم فى ادارة شئونهم اليومية مع الاجهزة التنفيذية

ثانيا الانتقال بالخدمات التى تقدم للمواطنين من الحكومة المركزية فى عاصمة الدولة الى المواطن حيث يقيم

ثالثا احداث عملية تنمية محلية حقيقية فى جميع الخدمات التى تقدم للمواطنين وذلك بقصد تحسين الظروف الاجتماعية والاقتصادية فى المجتمعات المحلية

تتكون وحدات الادارة المحلية فى مصر الى خمس وحدات وهى ( المحافظة وعددها 26 محافظة والمراكز وعدده 181 مركز

ومدن وعدده 214 مدينة والاحياء 76 حى و 1179 قرية

اختصاصات المجالس الشعبية المحلية

اولا مجلس محلى المحافظة يتولى الرقابة على مختلف المرافق والاعمال التى تدخل فى اختصاص المحافظة ويتولى الاشراف على خطط التنمية واقرار الموازنة السنوية للمحافظة

ثانيا مجلس محلى المركز يتولى الرقابة على اعمال المجالس الشعبية المحلية للمدن والقرى الواقعة فى نطاق المركز ويتولى الرقابة على مختلف المرافق التى تخدم اكثر من وحدة محلية فى نطاق المركز طبعا فى حدود القوانين واللوائح

ثالثا المجلس المحلى مدينة الرقابة والاشراف على مجالس الاحياء والتنسيق بينها

رابعا المجالس الشعبية المحلية للاحياء الرقابة والاشراف على مختلف المرافق ذات الطابع المحلى فى نطاق الحى

خامساً مجلس محلى قرية الرقابة على مختلف المرافق ذات الطابع المحلى فى نطاقه

ومنها اقتراح خطة تنمية اقتصادية واجتماعية وعمرانيا والعمل على نشر الوعى الزراعى

معلش بقى طولت عليكم

مدونتى فى الحزن مدعية وفى الفرح منسية

2008-03-09T12:08:00.000+02:00

السلام عليكم ورحمة الله وبركاته

انا مش عارفه اعتذر ازاى لان خلاص الحكاية بقيت ماسخة خاااااااالص كل شوية والتانى اعتذار والله مشغولة على الاخر وظروف شغلى اتغيير تمامآ ارجوا من الجميع ان تسامحونى لانى مقصرة مع الجميع

وكمان كنت مشغولة علشان انتخابات المحليات وكنت فى ورشة عمل ومن المفروض بأجهز فيها نفسى بس للاسف الشديد اخى العزيز قرر خوض الانتخابات وطبعا هو وطنى والوطنى الايام دى عاملة نظام شغل على تقيل انتخابات وحركات داخل الحزب بدلاً من المجمع الانتخابى سابقاً علشان يقفلوا الدنيا على المستقلين والمعارضة وكنت خلاص جهزت نفسى للاسف الشديد قررت التنحى عن هذه الخطوة التى حلمت بها كثيرة وعملت شوط كبير فيها

ليس كل ما يتمناه المرء يدركه

هذا ما حدث معى وانا حالياً ربنا اللى يعلم بيا فى حالة نفسية سيئة طبعاً الكل بيسال ليه ما تدخلى الانتخابات

كل المعارف اتصلوا عليا وقالوا ليا يا امانى بلاش انانية انتى كده هتخسرى اخوكى ايه يا جماعة هو انا هو هنقعد على مقعد واحد ده محافظة وانا اخرى قرية يا مركز

وقعدت احسبها مع نفسى وقررت واخيراً انى اتنحى عن هذا القرار والحسرة يعصر قلبى اختيار صعب يا اخسر اخى يا اخسر الانتخابات طبعاً الانتخابات هتتعوض لو ربنا سهل

وليا اسباب اخرى لو قررت فعلا انى انزل الانتخابات كنت هأكون لوحدى لان الوالد اهم هو اولى منى ده اللى سمعته بعد قرار اخى لا وكمان هما اللى قالوا له انزل واحنا وراك يعنى انا كده فى الهوا

وكمان انا مستقلة يعنى مش تبع الوطنى وكنت عاملة حسابى على مقعد المرأة لان فرصتى فى النجاح كانت ضعيف للغاية لانى مستقلة ومعارضة و لان المعارضة فى اسوان وفى كل الجمهورية اى كلام بأقولها وبكل صراحة اى كلام واخرهم كلام مفيش حد عايز يتعب كله متنسى الفرج فرج ايه مش عارفه هو فى حد هيعرف ياكل من غير ما يبحث عن الاكل

دعواتكم ليا اخرج من الحالة النفسية السيئة اللى انا فيها يمكن هو ده اختيارى فى الواضح بس طبعاً غصب عنى

رجاء من الجميع الانتباه كويس للمحليات وهذه المحليات ليس مثل اى محليات ولازم كل واحد يعرف اهمية المجلس المحلى واللى عايز ينزل يلحق اخر موعد يوم الخميس

يا حكام المهانة

2008-01-20T21:35:00.000+02:00

حســــــبنا الله ونعم الوكيل فيكم يا حكامنا

حسـبنا الله ونعم الوكيل فيكم يا حكام المهانة

اذهبوا الى مزبلة التاريخ الذى لن يرضى بيكم

بأكرهك يا حســنى بأكرهكم كلكم

ايه يا حسنى تصدر الغاز لأسرائيل وتمنع الادوية عن اخواننا

ايه يا شركات السياحة مش مكفيكم انكم بدخلوهم يتفسحوا فوق دماء اجددنا اوقفوا

تعاملتكم معهم

ايه يا مستوردين خلاص مفيش ضمير اوقفوا تعاملتكم معهم

حســــــــــــــــــــبنا الله ونعم الوكيل فى حكامنا

الرجاء الدخول هنا

http://alsarem-alhasem.blogspot.com/

لا اجد كلمات

2008-01-19T21:30:00.000+02:00

لا اجد كلمات تعبرعن ما اشعر به تجاه الاوضاع فى غزة والعراق ومـصر و الوطن العربى والاسلامى
وخـصوصآ اوضاع اخواننا فى فلسطين

أســــــــوان

2008-01-14T12:08:00.000+02:00

كــل سنة وانتم طيبين بمناسبة السنة الهجرية ياااااارب تكون سنة خير علينا وعلى الامة ياااااااااااااااااااااارب آمـــــــــــــين

انا بأعتذر بشدة لانى مقصرة مع المدونات اللى هى بقيت جزء من يومى على فكرة انا بأحاول اقرا واتابع المدونات على قد ما بأقدر لانى جهازى مازال يحتضر ومطحونة فى الشغل فيادوب بأقرا واجرى

انا قولت بما اننى بنت الجنوب فلازم افتكر اسوان فى عيدها على فكرة انا بأنسى عيد اسوان القومى امتى بس بأفتكر اول ما اشوف الاعلام على اعمدة الانارة بطول الكورنيش يا الرئيس فى اسوان يا عيد اسوان القومى على فكرة الجو ممتع اووووووووى فى اسوان والوزراء كلهم فى اسوان حاليآ يااااااااه نفسى اجبهم فى الصيف علشان يقولوا

خلاص توبنا وبلاها وزارة هههههههههه

أســــــــــــــــــــــــــــــــــوان

أرضية العلم باللون الأزرق نسبة إلى مياه بحيرة ناصر، ولون الشعار أصفر ذهبي ؛يتكون من ترس يرمز للصناعة داخل الترس أبراج الكهرباء المعبرة عن محطات الكهرباء بالسد العالي، ويتوسط الشعار خزان أسوان

بوابة مصر الجنوبيه تحدها من الشمال محافظة قــنا ومن الغرب محافظة الوادى الجديد ومن الشرق محافظة البحرالاحمر

وتقع اسوان على مدار السرطان علشان كده اللى بيزور اسوان حاليآ هيلاحظ فرق فى درجات الحرارة بين الليل والنهار

عدد سكان اسوان 1.1 مليون نسمة بس مش كلهم اسوان لان اسوان حاليآ فيها مغتربين كتير اوووووى

اشهر قبائل اســــــــــوان العباسين والنوبين والجعافرة والعليقات والاصولية والعبابدة والانصار واسوان بها خمس مراكز أدفــو وكوم امبـــو ودراو ونصر النوبة و مركز اسوان

نفسى بقى العيد الجاى ميكونش سمــــــــير يـوســــــــف اسوان بأكرهك يااااااااااااااا سمــــــــــير خربت اســـــــــــــوان كفاية عليك كده دى مش عزبة جدو الباشــــــــا دى اسوان يا سمــــير يوســــــــف

عيد اسوان القومى يوم 15يناير ذكري الانتهاء من بناء السد العالى عام 1970

لبيك اللهم لبيك

2007-12-13T14:40:00.000+02:00

بسم الله الرحمن الرحيم "وأذن في الناس بالحج يأتوك رجالا وعلى كل ضامر يأتين من كل فج عميق " صدق الله العظيم

لبيك اللهم لبيك لبيك لا شريك لك لبيك ان الحمدة والنعمة لك والملك لا شريك لك

الســــــــلام عليكم

2007-11-12T12:00:00.000+02:00

الســــــلام عـليـكم

بأقدم اعتذارى للجميع لاننى غيرقادرة لمتابعة المدونات

او حتى الرد على كـل من تكرم

وكتبلى تعليق بأشكرهم جميعآ

ولكم جزيل الشـكر

وذلك بسبب اصابة الجهاز بوعكة صحية بعد اصابته بفيرس

لعين لأعلم قد تطول او

تقصر كـل شئ بأمر الله وثم

مهندس الكمبيوتر

وعليكم السلام ورحمة الله وبركاته

من اقوال الامام الشافعى

2007-11-03T14:32:00.000+02:00

من اقوال الامام الشافعى رحمة الله عليه كلما نطق او نظم شعرآ يوجد بين سطوره الحكم والمواعظ رحمة الله عليك

أتذكر هذه الابيات كلما قررت الحفظ او المراجعة واجد صعوبة بالغة فى الحفظ

ادعولى ربنا يقدرنى احفظ وييسرلى طريق العلم والمعرفة النافعة لى وللامة

شكوت إلى وكيع سوء حفظي .........فأرشدني إلى ترك المعاصي

وأخبرني بأن العلم نور .......... ونور الله لا يهدى لعاصٍ

إنا الله وإنا إليه راجعون

2007-11-01T15:53:00.000+02:00

إنا لله وإنا اليه راجعون

لماذا فتحت هذا اليوم هل لكى احزن على فراقك يا اختى هل لاجد هذا الخبر المحزن وهى وفاة اختنا الحبيبه
هدى عبد الله صاحبة مدونة بهلولة
ماذا اقول يا اختى وهذه هى الحقيقة الواحدة فى حياتنا الموت و ما دايم غير الله ان العين لتدمع والقلب ليحزن لفراقك يا اختى الحبيبة
اللهم ارحمها واسكنها فسيح جناتك يااااااارب العالمين اللهم اغفر لها واجعل قبرها روضة من رياض الجنة يارب آمــين
يارب صبر
زوجها
واسرتها واجرهم فى مصيبتهم
اختى الحبيبة الراحلة ماذا اقول وانتم السابقون ونحن بكم لاحقون بأذن الله
إنا لله إنا إاليه راجعون

نســألكم الفاتحة

كـــــــل عيـــــــــد وانتم بخيـــــــــــــــر

2007-10-11T21:15:00.000+02:00

كــــــل عيد وانتم بخير واعاده الله علينا وعلى الامة الاســـــلامية بالخيـر واليمن والبركات

ويااااااااارب العيد الجاى تكون الامة فى احســــــــن حــــــال وتكون منتصرة يااااااااااااااارب آمـــــــــــــــــــين

ويـاااااااااارب العيد الجاى نكون افضـــــــــل حالآ ياااااااااااااارب آمــــــــــــــــــين

وياااااااااارب العيد الجاى تكون مصــــــــرنا الحبيبة بخير وحالها افضل ياااااااااارب آمــــــــــــين

وياااااااااارب العيــــــد الجاى تكون فلسطين والعراق فى افضل حــــال ويكون المســـــــلمين فى مشارق الارض ومغاربها بخير ومنتصرين يااااااارب آمـــــــــــين

ويااااااااااارب يكون عيـــــــــــد ســـــــــــعيد على الجميـــــــــع

ويااااااارب نكون طول السنة اخلاقنا وافعالنا وتصرفاتنا زى رمضان ونكون مخلصين فى العبادة زى رمضان ونقرأ القرءان كتير زى رمضان

ربنــــــــا يــــــــقدرنا ياااااااااااااااارب آمــــــــــــــــــين

قــــــــــــولـــــــوا آمــــــــــــــــــــــــــــــين

ويكون حياتنا كلها طاعة ياااااااااااااارب آمــــــــــــــــــــــــــين

ولازم طبــعا هأسمعك الكلام اللى بـاسمعه مع كـل عيـد واقوله لنفسى واللى نفسه يقول الكلام ده يقوله بنية خالصة ويدعى كويــس اصل انا حاسة الناس بتدعى باللسان يعنى من الاخر واجب اصل كلهم بيقول نفس الكلام وللاسف مفيش تغير

هأقول ايه الكلام اللى بأسمعه مع كل تليفون ومع كل اى حد بعيد علينا

ربنا يكرمك يارب والسنة اللى جاية تكونى بيتك ويارب السنة الجاية تكونى فى عمرة رمضان

وحياتكم ولا حاجة من اللى بيقوله غير انى زى مانا

:-D

معلــش بقى بهزار يا جماعة وكمان طولت عليكم اصل وحشنى اوووووووى الرغى و الغلاسة بتاعتى معلش استحملوا علشان العيد

وانا بقى هأعيد عليكم كلكم علشان ماحدش يقول ماخدش العيدية كل اللى هيدخل هيأخد العيدية

هى اى نعم فئة تكاد تكون غير مستعملة بس بقى على ادى علشان نقدر نقوم بالواجب مع الجميـــــــع

اللهم تقبل منا رمـضان

2007-09-13T23:43:00.000+02:00

رمضان كريم

2007-09-11T18:50:00.000+02:00

رمضان كريم

كـل رمضان والجميع بخير وفى احسن حال يااااااااااااارب آمـــــــــــين

كل رمضان والامة الاسلامية بخير يـااااااااااااااارب آمــــــــــــين

كل رمضان والامة الاسلامية بأذن الله تكون منصورة

كل رمضان والاخوة والاخوات بخير وربنا يثبتنا ياااااااااااااااارب آمــــــــــــــــين ويتقبل مانا صالح الاعمال ياااااااااااااااارب آمــــــــــــــــــين ويجعلنا من المقبولبين ياااااااااااااااااااارب آمــــــــــــــــــــــين

كــل رمضان ومصـرنا الحبيبة الغالية بألف خير ياااااااااااااااارب

الحـقوا رمضان فى صحتكم الحقوا رمضان وانتم فاضيين يا عالم السنة اللى جاية هتكون ازاى

رمضــــــــــــــــان كـــــــــــريم

طـــبعآ الله اكرم

الدعاء كل منا يدعوا للاخر بظهر الغيب لعل منا يكون دعوته مستجاب

ادعــــــــــــــوا لفلسطـــين الحبيبة ولعراقنـا الحبيبة ولكل الامة الاسلامية فى مشارق الارض ومغاربها ينصرنا ويعزنا

ياااااااااااااااااارب آمـــــــــين

ملحوظة الصورة من مدونة مـش أنا للمهندس علاء

الحمــدلله

2007-09-07T01:28:00.000+02:00

بعد عامان ونصف من العمل المتواصل والعمــل لمدة سنتين مدة 12 ساعة متواصلة يومــيآ ده غير الجمعــه اذا الامر استدعــى ذلك

الناس خلاص ماحدش فاكرنى ولا عارفنى قاعدة فى البلد ولا لاء نسيت الشوارع نسيت المشى فيها نسيت نفســـى لمدة

سنتين حتى صاحبتى اللى فى البلد ماحدش فاكرنى كلهم زعلانين منى ليهم حــق طبــعآ حتى اقاربى يقوليلى مقدرين

بس تشوفى فى عينهم زعلانين على الرغم كنت باحاول بقدر المستطاع اتواصل بالتليفون بس طبـعآ التليفون مش

بينفع لان سنتين شـئ مش سهل

الحمدلله اخدت اجازة على الرغم انها مش طويلة وكمان مش

هاسافر علشان رمضان على الابواب وكـل عام والامة الاسلامية بخير وفى البيت منشفين دماغهم مينفعش

طيب مينفعش مينفعش هاقعدلكم برضو فى البيت وانا اجازة ده الاهم الحمدلله مديرى الفاضل اللى عايزة الناس كلهم

يدعوله ربنا يكرمه ويصلح حاله يااااااااااااااارب آمــــين لانه بصراحة يبقى اخويـا علشان كده عايزة اقولكم اوعوا حد يشتغل

مع حد قريبه ولا حد يفكر فى القطاع الخاص خصوصآ لو كانوا اقارب لانك لازم تستحمل كتير اوووووووى ده كمان

غير المسئوليات اللى عليك الناس كلها ترتاح اللى انت تفضل تهلوس من الشغل من اللى وراك واللى منتظرك فى

الشـغل

وادعــو لنســـرين أمـة الله حبيبتى انها هى اللى ساعدتنى انى اقدر اخد الاجازة ربنا يكرمك ياااااااااااارب آمـــــــــــين وييسرلك كل امورك ياااااااااااااااارب آمــــــــــــــين

لانها بجـد هى اللى ساعدتنى انى اقدر اريح من شغل 12 ساعة بفضل الله ثم مساعدتها ليا وتحملها المسؤلية معايا كانت ومازلت بفضل الله نعمة الاخت والصديقة قبل الزميلة مش عارفه اقول ايه علشان اوفيها حقها

ربـــنا يكرمك ياااااااااااااااااااااااااااارب آمـــــــــــــــــــــــــــــــين

دعـــواتكم مـعانـآ ربنا يصلح حالنا وحال الامـــة ياااااااااااااااااااااارب آمــــــــــــــين

وبما اننى فى اجازة مش عارفه هادخل نت ولا لاء احتمال كبير ما اقدرش

معلـــش يا جماعة انى كاتبة البوست ده على الرغم انه لا يستدعى انى اكتب بوست علشانه بس بجد كان نفسى فى اجازة ومن شدة الفرحة بالاجازة قولت لازم اكتب

معذرة مرة اخرى

الرجـاء الدعـــــــاء

2007-09-03T13:16:00.000+03:00

الرجـاء الدعـاء بظهر الغيب لأختنا أمـــولا ربنا يفرج كربها ويزيح همها ويثبتها يااااااااااااااااااارب آمـــــــــــــــــــين

ويهديهـا ويوفقها لمـا فيها الصــلاح ياااااااااااااااارب آمــــــــــــــــين

وادعـــــو لجمــيع المكروبين ربـــنا يفرج كربهم يااااااااااااااااااااااارب آمــــــــــــــــين ويــهديهم ويوفقهم لمـــا فيه

الخيـــــــر ياااااااااااااااارب آمــــــــــين

ولا تنســــوا أخواتنا واخواننـا فى فلسطين والعراق ومشـــــــــارق الارض ومغاربها ربــنا ينصــــــــرهم ويثبت

اقدامهم ياااااااااااااااارب آمــــــــــــين

أبيــات

2007-08-27T13:00:00.000+03:00

ابيات لا اعرف من كاتبها بس انا لقيتها فى موقع المفيد للصور وعجبتنى قمت بقى حاطها علشان تعبانة ونفسى فى حاجات كتيرة و اولها الاجازة لان اخطائى زادت فى الشـغل والنسيان واللخبطة وعدم النوم وتوهان وحاجات كتيرة اوووووى

ارجـــــــــــــــــــو منـــكم الدعـــــــــاء

بـناءآ على سؤال من رفقتى وطلب نسر فتحت التعليقات

تحـــــــــديــث

كاتب هذه الابيات الامام الشافعى رحمه الله

طــبعآ مش عرفتها لوحدى لالالا انا عرفتها بعد تنويه وتوضيح من الطـائر الحــزين وبيــنو بارك الله فيهم قالوا صاحب هذه الابيات الامام الشافعى رحمه الله

لمــــا كـــل هــذا التعاطف

2007-08-21T12:29:00.000+03:00

انا متغاظة ودمى محروق ومستغربة اوووى من موقف الناس اللى زعلانين اوووى من دعاء المشــايخ على الصهانية والامريكان لا والله ايه التعاطف ده والقلوب الرقيقة دى مش معقولة مش متخليه يا عينى حرام ندعى عليهم صحيح اصلهم ملايكة واحنا وحشين بس ماكنتش متخلية اننا وحشين للدرجادى

اقولكم بقى احنا وحشين ليه اللى ما شوفت واحد منكم اتكلم عن فلسطين وحياتهم والعراق والمذابح اللى فيها اللى ما شوفت حد فيكم فضل مقاطعهم علشان ناخد بحقنا منهم

الى المتعاطفين مع الصهانية والامريكان لى أسئلة

هــل تعلموا ماذا يدرسو لأبنائهم قبل ان تتكلموا ؟

هـل تعلموا كم مذبحة ارتكبت فى حقنا وحق اخواننا فى فلسطين والعراق وكل الدول المحتلة ؟

هل تعلموا كــم اســير فى ســجون اسرئيل والامريكان ؟

هــل تعلموا كم لاجئ بسبب الصهانية والامريكان ؟

هــل تعلموا كم مبـعد عن اهله بسبب احكام الصهانية ؟

هــل تعلموا كم ارملة بسبب الصهانية والامريكان ؟

هل تعلمــوا كم يتيم بسبب الصهانية والامريكان ؟

هــل تعلموا كم مسجد وكنيسة حرقت على ايدى الصهانية والامريكان ؟

هل تعلموا كم منزل هدم على ايدى الصهانية والامريكان ؟

هــل تعلموا كيف يمر عليهم الشتاء والصيف دون كهرباء ومياه ؟

هل تعلموا كيف يمر عليهم الاعياد والمناسبات ؟

قائمة الاسئلة طويلة ولن تنتهى والارقام والاحصائيات لن توضح حجم المرارة التى هما فيها

كــنت اسمع فى الماضى الجــزائر بلد الميلون شهيد فلسطين والعراق بلد الكم مليون شــهيد؟

لســــه متعاطفين ؟؟؟؟؟؟؟؟؟؟

2007-08-19T15:15:00.000+03:00

تغطية مباشرة لمحاكمة الاخوان على موقع ابناء مصر

موضوعات رائعة

2007-08-19T14:58:00.001+03:00

موضوعات رائعة
استاذنا عصفور المدينة بدأ فى شرح كيفية التعامل مع النظام الجديد الذى بقى امر واقع علينا مـثل باقى الاشياء اللى هى بتبقى امر واقع بين يوم وليلة واتعودوا اننا بنسمع الكلام ناس مسالمة جميل اوووى الطاعة اللى احنا فيها الا أبدآ مش بنقوم بها لله وحده شئ فظيع قلة الحيلة والانكسار واننا كل يوم ناخد على دماغنا انا عارفه كلام مش ماشى مع بعض بس بجد شعب غريب ماحدش حاسس باى حاجة كل واحد فى وادى
المـــهم بقى ادخلوا عنــد اســـتاذنا ونحاول نفهم الدينا هتمشى ازاى وازاى نتعامل معاه علشان خلاص امر واقع
الموضوع على جزئين
DSL اسـتاذنا
والجــزء الثانى
DSL اسـتاذنا 2

المـــوضوع الثانى
الثبات ازاى الواحد يثبت فى الحاجات الصغيرة علشان ربنا يقدره ويثبت فى الحاجات الكبيرة كتب فى هذا الموضوع الصارم الحاسم تجربة شخصية له موضوع اكثر من رائع حاولوا تشوفوا الموضوع وازاى نبدأ بالصغيرة حتى لو كنا فى حاجة لها علشان ربنا يعينا على الكبيرة ربنا يثبتنا جمــيعآ ياااااااااارب آمـــــــين
وإن تطع أكثر من في الأرض
المــوضوع الثالث
عن الدعاء واهميته وبما احنا فى شهر شعبان رفقة عمر منزلة موضوع حكاية على الرغم كل الموضوعات اللى ورا بعض كلهم احلى من بعض بس انا شايفة موضوع الدعــاء ده مهم اووى خصوصـآ هذه الايام شـــهر شعبان
يوم رزق زكريا الولد

الموضوع الرابع
من عند مــاعليــنا موضوع اكثر من رائع
الموضوع برضو على جزئين
الوصول لقبول احاديث الرسول

تدوين السنة

استبيان

2007-08-18T19:19:00.000+03:00

استبيان من هوندا

ولازم الكل يقول لا على الرغم ان خلاص فاضل ايام معدودة وهنلاقى كل شئ وضح بس طـبعآ ربـــــنا كــريم

وبرضو مش هنغلب ومش هنسيب وقاعدين على قلبكم ياااااااااااا حــكومة احنا الاكتر

بس يااااااااااارب يفوقوا ويصحيوا الشعب ده

هو مدى أستخدامك للأنترنت ؟؟مستخدم اعتيادى - ايميل - شات - العابمستخدم احترافى - خدمات الوب 2 -

تحميل - العاب - برامج - بودكاستس - ميديا 2متخصص ( مصمم مواقع - مصمم جرافيك - مطور برامج - مطور مواقع - اعلامى - مبرمج - مستخدم لينكس )

ج :- مســتخدم اعتيادى - ايميل - شات واهم شئ الالعاب لما اكون فاضية

كيف ترى هذى الحملة وما مدى تأثيرها على المستخدمين والمختصين ؟؟1- هل تساهم بتقدمنا الحضارى والتكنولوجى ام ترجعنا للخلف؟2- هل تفرض حصارا معلوماتيا على المتخصصين والطلبة والشعب ؟3-هل ستؤثر سلبا على مركزنا الحضارى ( الأول:) ) فى صناعة البرمجيات وتكنلوجيا المعلومات ؟؟؟؟

ج : 1- 2

ما رأيك بقرار وزير الاتصالات الجديد ؟هل سيساهم بنشر خدمة الانترنت فى مصر ام هل سيؤدى الى تقلصها ؟؟

ج: طبعآ تقلصها

ما هى اسباب الوزير المعلنة والغير معلنة فى رأيك ؟؟؟؟

ج: الربح وخنق الجمهور اهم شئ

وانهم يخففوا عدد السكان بقدر المستطاع وقطع المحافظات عن بعض بعد كثرة الحوادث وغلو الاسعار فى المكالمات والمواصلات وهلم جر

من هم المستهدفون بهذا القرار ؟هل هم المدونون السياسيون فى لعبة القط والفأر بينهم وبين الحكومة ؟ ام محملى الافلام والبرامج ؟؟ام هل هم العاملين بصناعة التكنلوجيا من مطورين مصممين ومبرمجين ؟؟؟

ج: جمـيع فئات الشعب بأكمله وخصوصآ المعارضيين

هل تهدف الحكومة من هكذا قرار بتطبيق المبدأ العربى الشهير الا وهو فرض الوصاية على هذا الشعب القاصر ( من وجهة نظر الحكومة ؟)

ج نعم

كيف ستتراجع الحكومة عن قرارها ؟بالضغوط الشعبية والتفاعل الحيوى للمتضريين من الشباب والشعب؟بالضغوط الخارجية من منظمات الحريات العالمية ؟؟؟بالمساهمة بتطبيق العالم قرية صغيرة ونشر توابع هذا القرار للعالم اجمع بلغات عدة ؟؟؟بالمقاطعة الشعبية لوزارة الاتصالات وشركات الانترنت ؟ ومقاطعة التلفونات الأرضية ؟؟؟

ج من رايى مقاطعة كل شئ

كيف تصف هذا الحدث ؟؟

ليس غريب على هذه الحكومة ومتوقع لمزيد من الخنق وكسرة شوكة هذا الشعب المقهور

سرقة واستغلال سبوبة حكم القوى على الضعيف اذلال الشعب عقوبة جماعية للمستخدمين نيابة عن المدونين السياسيين ؟غير ذلك ؟؟؟

ج عقوبة للجميع

هل يستحق وزير الاتصالات الائتمان على أمن مصر المعلوماتى وصناعة التكنلوجيا بمصر؟؟؟

بالنسبة لهم ممتاز اما بقى بالنسبة لشعبنا مش مهم عندهم

بعد ان أثبت سوء نيته و مشروعة الذى يهدف الى تدمير البنية التحتية لصناعة المعلومات فى مصر؟؟

ماذا تتوقع من تفاعل هذى الحملة عالميا وعربيا ومحليا ؟؟؟؟

ج فى الحقيقة لا اتوقع اى شئ لاننا اتعودنا على كل شئ بيعدى

هل أثبتت وزارة الاتصالات والمعلومات فى مصر جهلها العملى والمعلوماتى و سوء تقديرها للظروف المحلية والدوليه ... واستغلالها للوضع المحلى ؟؟؟

ج طبيعى مش فارقة معاهم لانهم عايزينا نبقى منعزلين

ما هو الحل فى رأيك ؟؟الحملة وجمع التوقيعات ؟؟؟المقاطعة العامة لشركات الانترنت ؟؟؟؟المقاطعة العامة لشركة الأتصالات المصرية ؟؟ وتشمل التلفونات الأرضية بعد انا عانينا من سرقتها واستغلالهاوسوء أدارتها ومقاطعة خطة الخطوط الجديدة ؟؟؟؟؟؟

ج المقاطعة بكافة انواعها

هل ترى ان نجاح الحملة يتمثل فى1- اقالة الوزير الجاهل بمعايير صناعة التكنلوجيا ومواكبة التطور2- التراجع عن القرار فقط3-وضع نظامين تحت بند اختيارى

لن يجدى اى شئ يذكر

ماذا ترى فى المناورة الاخيرة للحكومة تحت ضغط المرحلة الأولى من الحملة ؟؟؟؟مناورة واضحة وكذب صريح؟؟مناورة للحجر على العقول والافكار و تقسيم الشعب اللى طبقات تحت بند الاختيارية ؟؟فاكرينا داقين عصافير وبنصدق الكذب بتاعهم ؟؟؟؟

ج انا مش عارفه ايه اللى هيحصل وربنا يستر

ياريت كل الناس تعمله وتقول فى مدونة قولوا لا للانترنت المحدود انك عملته

يارب يجيب نتيجة

ســبحان الله

2007-08-15T04:30:00.000+03:00

ايه الحكاية

2007-08-12T13:28:00.000+03:00

انا عايزة اعرف ايه حكاية المدونات اللى بتتقفل فجـأة هل هما اصحابها يقومون

بأغلاقها ام اسباب اخرى

الاستاذ مراغى صاحب مدونة كله عند العرب صابون

احمد العربى صاحب مدونة فكرة مصرية

ليا رجاء لو لسه بتدخلوا قالوا لنا الاسباب او اى حد بيعرفهم معرفة شخصية

تاجات

2007-08-09T23:39:00.000+03:00

وبما اننى اتحرمنا من موسم التخفيضات علشان مفيش دلوقتى عمر افندى ولا اى شركة من الشركات ماحدش يزعل نفسه ودلوقتى فى تخفيضات على التاجات

بأعتذر عن التاخير

انا هاعمل التاج ياهوندا كمان يومين بالظبط ان شاء الله ربنا يسهل

التاج الاول مـن أســــتاذعصفور المدينة

اسم مدونتك؟

بنت الجنوب

لماذا اخترته ..وماهي نيتك من وراء اختياره؟

لانى انا الجنوب كل حاجة فيا بتقول انا الجنوبية ولانى كمان

بأحس الجنوب مهمل ومنسى حتى من الجنوبين نفسهم

النية كان نفسى ابقى صوت الجنوب بجد اقول مشاكلهم همومهم احلامهم عاداتهم تقاليدهم ايه اللى نفسى يتغير وايه اللى نفسى حتى لو بعد مليون سنة تفضل زى ما هى

هل فكرت في إغلاق مدونتك؟ والسبب؟

لا لالالالالا ليه بس هو احنا لسه عملنا حاجة و لو مضايقة او تعبانة او مخى واقف اخر ما معايا مش بأكتب خاااااالص

صورتك في المدونة ورمزيتها ؟؟

صورتى بتقول اسوان الحديثة والقديمة واسوان مميزة عن اى مكان بشـكل النيل والطبيعة يعنى اسوان مش المعابد ولا السد اسوان النيل والجبال

لماذا دخلت عالم التدوين من الاساس؟

انا كنت هاعملها من سنة 2005 من بعد انتخابات الشعب بس فشلت وبعد كده نسيت وعملت الاسبيس على الهوتميل وبعد كده ما كنتش عارفه اتواصل مع الناس خصوصآ اللى هما برايفيت لازم يوزرنايم وباسوورد وكمان بعد ما الاسبيس طلع عينى وبيتحكم فيا بطريقة غريبة

جمله قيلت لك فى وصف مدونتك؟

أممممممممممممم

ليه الاحراج ده اصل مدونتى مش دينى ولا سياسى يعنى عادية واحدة بتقول اللى جواها هما اتنين اتكلموا عنى نــدى عيونى من فلـــسطـــــين
ورفقتى كتبت بوست عنى
التعليقات بالنسبه لك ,اهميتها؟
أكـــيد لها اهميه لانها مشجعة و خــصوصآ لو فيه تصحيح لمفهوم معين او توضيح
احلى بوست كتبته ...ضع اللينك , ثم اذكر لماذا؟
مش عارفه

أفضل بوست قرأته؟ وضع لينكه؟

فى كتير

أفضل مدونة قرأتها؟
لالالالالالا بقى كده بتوقعنى فى الغلــط

اكيد كل مدونة بأدخلها هما الافضل عندىوكمان فى كتيرة حلو ومش بألحق ادخلها بسبب الوقت لا يسمح وبأكون عايزة يوم تانى على اليوم يعنى يكون 48 ساعة بدلآ من 24 ههههههه علشان العبادة والشغل والعلاقات الانسانية والاكل والنوم والراحة والفسحة

اقول من ومن غيـــــر زعـــــل

مـدونــة أســــتاذعصفور المدينة
اقولكم ليه أســـتاذنا الاكبر ســنآ فى المدونات اللى بأدخلها بسم الله مشــاء الله ولا حول ولا قوة الا بالله ذو علم لا يتعالى بعلمه بل بالعكس انسان بيسط وبيحاول بقدر المستطاع يبسط من موضوعاته واكيد الكــل بيلاحظه ده فى كتابته مش ملعبكة على الرغم فى حاجات ممكن افهما بطريقة تانية وبيوضح فى التعليقات الحاجات اللى ماحدش فهمه وكمان فى تعليقاته مش بيمل من تشجيع المدونين والنصح والارشاد يعنى من الاخر بقى

الكــــــبير كــــــبير

يـلا بقى ادعو لأســـــــتاذنا ربنا يبارك فيه وفى اهله واولاده ويوفقه يااااااااااااااااارب آمـــــــــــين وييسرله كل اموره يااااااااااااااااااااااااااااااااااارب آمـــــــــــــــين

ما تقولوا آمــــــــين

حد قل أدبه فى التعليق إيه رد فعلك؟

مفيش الحمدلله واذا كان مره فى تعليق سخيف مسحته علطول

أسوأ بوست أسوأ مدون؟

كتيرررررر

هيحصل ايه لإيميلك لما تموت ؟؟
اولا لو الموتة فجأة هتقفل بعد فترة اما بقى لو كنت مريضة مرض الموت وباعرف اتكلم يبقى اكيد هاكتب الباسوورد يا اما هاديه لآى حد علشان يبلغ الناس اللى عندى انتقلت الى الرفيق الاعلى
علشان يقرأو الفاتحة والواحد يستفيد منهم

اديت الباسوورد لحد قبل كده؟

اخويا واختى وناس تانية ورفقتى ونســـــر ولوحد طلب الباسوورد هاديله اصله عادى يعنى فيه اسرار الحربية

بس غيرت اغلبهم علشان انا أصلآ بأغير الباسوورد كل فترة

معلش بقى يا جماعة

كانت إيه طبيعة علاقتك بيه؟

بمين فيهم بالظبط

اسمك؟

أمــــــانى

المشهور بيه وسط اصحابك؟

أصحابى مين بالظبط ايام الجامعة كنت مشهورة بسمراء الجروب

ومــــونى

وأمــــــونة

ونسر بتقولى مانو

ههههههههههههههههه

مش عارفه قولت كتير اصلى ماليش اسم ثابت
شخصيتك نوعها إيه؟

ازاى يعنى

غريبة الاطوار هههههه

اللى يشوفنى ميقدرش يكون اى انطباع عنى الا بعد فترة لانى حريصة اوووى فى تعاملاتى بس اللى يشوفنى يقول عليا غلسة لانى ممكن اجيب شلل للقدامى من الصمت والنظرات المستفزة . وباموت فى الرخامة على خلق الله شـخصـية غريبة ومع ظروف الشغل بقيت اغرب ههههههههه
ومش بأعرف ازعل من حــد خـالص الا اذا سبب لي مشاكل او ازمة خصوصآ لو طرف ثالث عرف بالمشكلة

نقول ايه ايه على حسب الموقف

السفر بالنسبة لك؟

مش بأحب السفر علشان بعد المسافات ولان اسوان بعيدة وباضايق من السفر خصـوصـآ القطارات علشان مواعيدها العســل والسفر بالنسبالى غربة وخوف من اللى منتظرنى فى المكان اللى رايحها خصـوصـآ لو كان شيكاغـو اللى هى القاهرة سابقآ
وقت فراغك بتعمل فيه إيه؟
بأناااااااااااااام لان مفيش وقت عندى للنوم ولا حتى للراحة
المود بتاعك؟

متغير اى اكيـد زى الطقس

الاكلة المفضلة؟
المكرونة والســـــمك والملوخـــــية

صفات اللي أخدتها من بابا؟
الشـكل ولا الطباع
مين فيهم اممممممممممم؟

الكلام بسرعة اوى لدرجة انى ساعات كتير اتكلم واللى قدامى ما يفهمش بأقول ايه ويستنى لغاية ما اخلص علشان اعيد من تانى هههههه المودة وحــب الاصحاب كان نفسى اخد منه النظام لان النظام كان سبب الخلاف الدائم بينا الله يرحمه ويرحم امواتنا ياااااااااارب آمــــــــين

الصفات التي أخدتها من ماما ؟

الدمـوع اللى عايزة لى محبس ليهم والسكوت كتير اوووى وارضاء الغير حتى لو حسب نفسنا والصفة دى اللى تاعبانى اوووووى ونفسى اغيرها ومش عارفه
اكتر ست حاجات بكرهها؟

الكــــدب والنفاق والظلم واللى بينقل الكلام وافشاء الاسرار والصوت العالى واللى ميحترمش الناس ويدخن فى وشهم بأكون عايزة اخبطه فى دماغه
اكتر ست حاجات بحبها؟
الصدق والامانة والطيبة والاحسان وحب الخير للغير و مودة الاخرين

الشغل بالنسبة لك؟
مسـئولية ووجع قلب ومرض ههههههه

كفاية علشان ما اجبش احباط للناس
الانترنت بالنسبه لك؟
عالم افتراضى بيأثر فى عالمى الواقع بأى شكل من الاشكال
امرره لمين ؟
لا لسه لان فى تاج تانى

من ياسر مدنى دينامو الاخوان

هل تحرص بصدق علي تجديد النيه قبل الدخول علي النت؟؟؟

النية مش عارفه تقصد ايه بس اللى اقدر اقوله انى بأقول

الدعاء ده علطول اللـــهم طـهر قـلبى مـن الحـقد والحـسد وطـهر قـلبى مـن الـنفاق وعملى مـن الرياء ولسانى من الكذب وعـينى مـن الخيـانة فانك تـعلم خـائنة الاعـين ومـا تخفى الصـدور

ما رأيك في جريده الدستور؟

جريدة كويسة انا بأجيبها بس مش بألحق اقرأ بأفتح اشوف العناوين حأشوف قريب بتاع الجرايد لو يمكنه استضافتى واتصفح العناوين وخلاص بدلآ من الشراء وكمان بأحسهم رغايين اووى
هل بعد قراءتك للإجابتين إللي فاتوا ..حسيت إن أنا أيه؟؟ولا تنسي الصدق.؟

انت ياسر ههههههههه مالك يا عم ياسر اختك مخها واقف والله مانا فاهمة حاجة
هل تثق في جريده الدستور؟؟؟

انا بصراحة مش بأثق فى حد خاااااااااالص يعنى عادى حد بيقول الاخبار وخلاص وعندهم ناس شاطرين فى الكتابة
أنا بحبكو في الله..فهل تحبونني...ولا تنسوا الصدق؟؟

الدستور اللى بيقول كده ولا حضرتك

انا عارفه انى بايخة بأهرز بس هههههههه

وانت اخ عزيز علينا

هل تعمل في السياسه والعمل العام أكثر من الربانيات والروحانيات؟؟؟

انا اعمل فى مجال السكرتارية حاليآ هههههههه

اصلى والله مانا فاهمة

هل الدستور تحب الإخوان,,ولا بتستغلها؟؟

وبما اننى مش الاخوان فالله اعلم على العموم انا سمعت واحد من اليسار قالى الدستور تبع الاخوان وناس من الاخوان بيقولوا الدستور غاوية تبهدل في الاخوان الله اعلم مين الصح ومين الغلط

اللى اقدر اقوله ربــنا يـصلح حـال مصـــــــر

امرر لمين لا لسه فى اختبار

من دكتورة دكتورة ما علينا معلش بقى اتاخرت فيه

وبما اننى بليدة فى كل الاختبارات حتى اختبار الادمان البلوج طلعت 67% ههههههه على فكرة ده الاختبار الثانى الاول كان 75%بس النسبة نزلت
امرر لمـــين

بصوا بقى شوفوا عملتوا ايه من دول واعملوا اللى ما اتعلمش

البردية لأبومــــــنه

باشمهندس عيون
الباشمهندس مـا عليـنا
الباحث عن الحقيقة

حائر فى دنيا الله ربنا يرجعه بالسلامة يارب آمــين
حواديت وخزعبلات
هوندا
فكرة مصرية
مرمر بتاعت التخاريف
صرصارة
ابن اسوان دكتور المستقبل
ريـمـــــــــــو
خمسة فضفضة

قطـــتى
الاغلبية الصامتة
وسام
دكتورة ما علينا

مناجاة
ابوزياد الفاتح
ريـــنا

أنسانة
مراغى
بهلولة
مناجاة
علية وعايزة تفهم
بهلولة
ياسر مدنى دينامو الاخوان
داعية المستقبل
عباد الرحمن
لاتحزن
سمراء النيل

هل الزبون دائمآ على حق

2007-08-04T22:03:00.000+03:00

انا بأعتذر لأســـتاذنا ولكل واحد بعتلى تاج علشان لسه مش هاقدر اعمله علشان مشغولة اوووووى لان طــبعآ نسرين أمة الاسد التانى سافرت الاسكندرية بتصيف يااااارب تروح وترجع بالســــلامة ياااااااارب آمـــــــين

اصل احنا اسدين قصر النيل اوعى حد يقولها

معلش بقى انا عارفه انه بوست بايخ زيى بس بجد مخنوقة ومضايقة لو حد جرب شغل العملاء هيعرف قرفهم ايه الظاهر انا مكتوب عليا كل ما اروح مكان لازم اتعامل مع البنى ادمين نفسى اتعامل مع ورق بس لان برضو المحاماه سبتها علشان الناس وتعبهم

هل الذبون دائمآ على حق لا بقى مثل فاشل ولا اعتقد به لان اللى يجرب شغل العملاء ولمؤاخذة بقى و قرفهم ازاى تقعد تحايل وتناهد معاهم علشان يفهموا وهما اصلا ولا بيفهموا ولا حاجة خاااااااالص شئ متعب للغاية وكل واحد طبعآ والمود بتاعه وياسلام بقى لو اللى جاى عندك عايز يروح على نفسه وشكله حد زاقه عليك علشان يضايقك وياسلام كمان لو الميعاد مكتوب مواعيد العمل من كذا الى كذا وهو أصلآ مصمم يدخل عندك ويستفسار معلش هو سؤال صغير والله السؤال الصغير ده بيفرش مش بيسأل ده قهوة عايز شاى ولا حاجة ساقعة ويكون شايفاك مضايق وبتبص فى الساعة يعنى خلاص عايزين نمشى يقولك معلش بقى اخرتك معايا يخرب بيت كده اخلص يا عم حرام عليك عايزة امشى والميعاد فات من بدرى ولسه بيتى بعيد والله بأخد مواصلات لسه وكده وهو برضو قاعد يعنى ايه عايز

ولا واحدة بقى بجد قربت تخلينى اسيب الشغل والبلد ليها عايزة طريقة اتعامل معاها لانها خلاص جننتنى بجد باقلها سنة وسبع شهور بتسأل على الكورسات وتجى تمسك الكتاب وتقرأ فيه وتمشى شبه يوميــآ بجد بجد قرفت نفسى اطردها بس مش قادرة نفسى اعملها وش خشب

هل مــازال الزبون على حق

ومين بقى يجيب لنا حقنا

حملة إفضحـــــــــــــوا تجــــــار الكيــــف

2007-07-29T16:12:00.000+03:00

معلش بقى انى كنت متاخرة فى الحملة ومتاخرة فى كل حاجة بسبب ظروف خارجة عن ارادتى

انا بقى هأقول كلمتين

اثناء فترة عملى بمهنة المحاماة مكنتش متخيلة ان تجار المخدرات بيكونوا لهم نفوذ بهذا الشكل

كان فى متهم ومحكوم عليه بــ15 سنة سجن طبعآ المحامين كانوا بيلعبوا لعبة حقيرة بيعملوا ايصالات امانة مضروبة علشان هذا المتهم يجى من الليمان ويقعد هنا فى الحبس لكى يتكمن الاسرة الكريمة من زيارته

انا كنت بأستغرب اووى كان يقف فى القفص بجلبية مكوية على سنجة عشرة ومراته واقفة جنبه وحاطة الاحمر والاخضر ولا كانهم طالعين نزهة وطبعآ العساكر وبعض من الظباط كانوا بيخافوا منه ليه

علشان كان بيدفعلهم انا والله سمعته يشتم الصول وبيقوله اسكت علشان انا بأدفع لكبيركم ؟؟؟؟

هنا يبقى الســــؤال من يدعم هؤلاء التجار

لمـاذا لا نقف تضدهم ؟

لمــاذا لم تتحرك اى قوة من قوى الشعب حتى الان بعد تزايد نسبة الادمان والجرائم التى تحدث من ورا هذه التجارة ؟

لماذا لا تقف وزارة الداخلية وزارة الصحة ضد الصيدليات التى تقوم بترويج الانواع المحظورة ؟

اما ان الاوان لكى ننقذ شباب الامة

ولى كــلمة واحدة الى الاسرة الى الاب اولآ اتقى الله فى اولادك

لا تدخن بجوارهم لانهم سوف يكونوا عرضة للتدخين وما بعد التدخين

الى الام اذا لقيتى حد من اولادك بيدخن قولى عليه والده علشان يعرف مش تخبى عليه والمصيبة تكبر

اللهم كـــن معانا ولا تكن علينا

هذه المدونة الخاصة بالحملة

حملة إفضحــوا تجار الكيف

صحيح قليل البخت يلاقى العظم فى فى الزبادى

2007-07-24T18:52:00.000+03:00

انا عارفه عنوان مستفز بس معلش اعذرونى

البوست اللى فات علشان النت كان قاطع اول مرة اعرف انى نحس مركب وصحيح المثل اللى بيقول قليل البخت يلاقى العظم ولا بلاش

أنا كل يوم بأسال امتى هيشتغل رد وقالى على اخر سبعة قولت خير وبركة الحمدلله اخيــرآ ,,,,, ولكن فرحة ما تمت نزل الخبر الفقر بتخفيض سعر النت وطبعا الناس فرحان ركز كويس وانت بتقرأ وشوف المغزى ايه انا بقى بأعتبر تخفيض سعر النت ده عامل زى السم المدسوس فى العســل ولا نقول عليه العســــــل المر

أســـتاذنا معا ضد نظام الانترنت الجديد

قعدت احسب حسبة اسـتاذنا عصفور المدينة اللى قام مشكورآ بشرح النظام زعلت اوووى وحزنت اوووى ده كده ممكن يسبب بعد الشر خسائر فظيع للشركة وللناس اللى فاتحين كافى نت بجد كارثة وماحدش حاسس وخصوصآ احنا بنرسل ملفات وبنستقبل ملفات هنعمل ايه

اقول ايه

حســــــبنا الله ونعم الوكــــيل

قولت مع نفسى لازم اشترك فى اى حملة ولا حتى نعمل مظاهرة بجد لو مش هيغيروا رايهم لازم الكل يقاطعهم علشان يعرفوا قيمتنا واحنا اد ايه مؤثرين

ولينك الحملة منقولة من مدونة الباشمهندس علاء مش أنا

الحملة الإليكترونية لمناهضة القيود الجديدة على خطوط الانترنت فائق السرعة في مصر
http://www.mesh-gayeb.com/
_
موقع الحملة الشعبية لرفض اتفاقية الانترنت الفائق السرعة الجديده
http://netegypt.ch/
_

أعتــذار تصدقوا النت قاطع عن الجنوب

2007-07-09T15:20:00.000+03:00

أعتـذار عن التاخير

اصلى مش عارفه اقول ايه ولا اعيد ايه على الحال اللى وصلنا ليه والمعاملة اللى بيتعامل به سكان هذه الجمهورية وبالاخـص اهل الجنوب وبما اننى كمان من قرية من محافظات الجنوب يعنى الخدمات تكاد تكون منعدمة علشان مابقاش كدابة قريتنا يعتبر من احسن القرى حظــآ

ادخل بقى فى الموضوع انا كنت غايبة ليه ومش بأدخل مش بمزاجى قال ايه النت قاطع عن الجــنوب نعم؟! ايون أكلم المسئول يا استاذة فى عطل من اسيوط الجنوب كله مش شغال ازاى يعنى الشغل عندى واقف كل حاجة ياباشمهندس بالنت امتحانات وتقارير ومالوا هما عليهم بايه نرجع احنا تانى نعتذر للعميل عدى علينا بكره علشان تمتحن ولا اقول لحضرتك احنا هنتصل بحضرتك علشان الامتحانات والتقارير بقى مع الســلامة بس بقى كنت مرتاحة من الادارة اصلهم كلامهم كتير اووى بس فى سركم يعنى اوعى حــد يقولهم

طيب مش مشكلة لما اروح البيت نشتغل دايل اب علشان القرية بتاعتنا لما تنعم حتى الان بالدى اس ال ليه علشان مفيش هاردوير فى السنترال علشان خاطر الموافقات ايه؟! هو انتو هتبنوا السد العالى من جديد مش مشكلة اشتغلى دايل اب وبلاش توجعى راسك على الرغم انى بأحس هيجلى شلل لان السرعة 33 كليو بايت بس كانى بأشحتها

صحبتى الله يكرمها قالتلى غيرى الرقم اللى داخلة عليها واخدت منها الرقم اللى السرعة بيكون عندها 48 كليو بايت علشان الرقم اللى انتى داخلة عليها ضغط طيب يعنى ادخل وارجع تانى أهئ أهئ مش معقولة انا خايفة اطلع ما يدخلش تانى لالالا على ضمانتى حاضر يا عيونى دخلت على الرقم التانى ها السرعة ايه وحياتك زى ما هى ههههههه هى لالالا مش معقولة تلاقيها علشان المسافة

اشتغل فى الشات زى النار ده يوم الخميس بالليل واتكلمت انا وصحبتى وقفلت تانى يوم بقى افتح النت علشان الصفحة تحمل وهى ابدآ منشفة دماغها طيب اروح اعمل تليفون علشان تحمل برضو مفيش فايدة قمت فاصلة الجهاز ومريحة دماغى علشان هى أصلآ العملية مش ناقصة شوفتوا المعاملة

تصدقوا بقى كنت حاسة نفسى كانى قاعدة فى صحرا من غير نت ايه هو النت لحس دماغى ولا ايه ؟! مش عارفه ربنا يستر

الحــمدلله النت رجع بالســلامة

تخاريف حر

2007-06-27T14:57:00.000+03:00

بما انى مطحونة اوووووى فى الشغل ومش عارفه اكتب ولا عارفه اقول ايه وحاسة دماغى خلاص هتنفجر والاسلاك هتضرب فى بعضها وشكل مخى عليه فيروسات كتيرة عايز فورمات اصله مش نافع فيه اصلاح ولا نافع اغير الويندوز ونفسى انام ونفسى فى اجازة
ادعولى ربنا يعينى ويعين الجميع ياااااااااااارب آمــــــــــــين
وكمان يا سلام على الصيف وجمال الصيف امريكا واوربا تتقدم واحنا نموت من الحر علشان خاطر عيونهم ومالو كله بثوابه
وبتوع النشرة الجوية كدابين زى اللى مشغلنيهم قال ايه الحرارة 45 يا كدابين ده درجة الظل تعدى 48 امال فى الشمس كام مش عارفه تلاقيها عدى الميه ربنا يرحمنا من عنده

اللى عايزة اقوله حر الدنيا كده واحنا مش مستحملين ده ولا ذرة من حر الاخر

يااااارب ارحمنا من عندك يااااارب آمــــــــين

اللهم ظلنا تحت عرشك يوم لا ظل الا ظلك

اللهم إنا نسألك الجنة وما قرب إليها من قول وعمل

اللهم إنا نعوذ بك من النار وما قرب إليها من قول وعمل

اللهم أجرنا من النار اللهم أجرنا من النار

معلش ابقى اعذرونى واستحملونى بوست اى كلام بس اعمل ايه

مش قادرة استوعب

2007-06-16T17:28:00.000+03:00

لم أعد افهم شئ على الاطلاق ولا اريد ان افهم ولا اريد أن استوعب هذه الحقائق المؤلمة الموجعة

أننى اتجرع يوميـآ امام شاشة التلفز والقنوات الاخبارية والجرائد اليوميه والاسبوعية المرارة فى كــلما وقعتى عنى على الاحداث

أننى أتالم من ينقذنا من انفسنا

من يأخذ بأيدينا

لا أحدآ سواك ياااا الله يا يا مجيب الدعوات اجب دعواتنا

اللهم ارحمنا من عندك اللهم ارفع عنا البلاء ياااااارب آمـــــين

مــــــاذا حـــــدث؟

مـــــاذا يــحدث؟

هــــل من اجابة ؟

من العميل ومن الجاسوس ومن الخائن؟

ومن الظالم ومن المظلوم؟

نظرة لعالمنا العربى الجريح

فى مصر بدأت من جديد تطفو الفتنة الطائفة بداية من العياط والان الاسكندرية واول امس بنى سويف هل نعيش وهم اسمه التعايش

كفاية بقى سلام الذقون كفاية الابتسامات الصفرا

ننزل شوية بقى على

السودان

مشكلة دارفور لسه شغالة وامريكا عايز تحشر نفسها فى الموضوع

الصومال

الحرب مازال دائرة هناك ولم تتعب اى دولة عربية نفسها وحاولت التهدئة هناك ليه علشان هما بعيد عن حدودهم ومش هيكون فى لأجيين لبلادهم

نروح فين بقى

فلسطين

حبيبتى الجريحة منذ عشرات السنين ولم تئن ولم تعبت من النضال ولكن تحول كل شئ الى النقيض

حرب داخلية بين فتح وحماس

وكسروا كل شئ

هل هى لعبة انساق لها الجميع لتجريد الفلسطنين من الاسلحة وللقضاء على المقاومة بكافة اشكالها

نروح فين تانى

لبنان

من بعد أغتيال رفيق الحريرى الدنيا مازالت مولعة برضو اعتصامات فى الشوارع واغتيالات وهلم جر وفى الاخر الجيش اللبنانى ضد فتح الاسلام

اللى انا مش عارفه مين فتح الاسلام ولا مين الجيش اللبنانى بصراحة الاتنين جديد عليا

نجــى بقى الى

العراق الجريح

دماء أبنائها غطت شوارع العراق

سنة وشيعة ما بكم يا اخوانى لقد صبرتم حصار دام ثلاثة عشر عامآ ماذا حدث لكم

فى حد تانى لسه لو حد عارف يبقى يقولى علشان اكمل باقيه البكاء والحزن

انتخابات الشورى

2007-06-14T17:46:00.000+03:00

مرت الجولة الاولى على خير والحمدلله فى الدائرة الاولى ونجح مرشح الحزب الوطنى العضو العباسى النوبى اللى اكتسح كل الجعافرة اللى كانت اصواتهم مشتتة بين المرشحين والدنيا كلها افراح والناس اللى بتبارك والدنيا هيصة لغاية دلوقتى لان النوبين كده ليهم مقعد فى الشعب ومقعد فى الشورى

تصوروا بقى الناس برضو كانت بتباركلى ليه علشان البيت كلهم وطنى ومن المفروض انى انا كمان وطنى وهم عارفيين انا مش وطنى بس علشان يغيظوا فيا وكمان برضو احنا عباسين يعنى من المفروض افرح اصل هم بيبصوا لموضوع الانتخابات بوجهة نظر مختلفة عنى وعن اللى اتربيت عليها ان الانتخابات عضو هيروح يكون أد المكان ويكون صاحى مش نايم فى المجلس مش القوانين تمر من تحت ايده وهو ولا هنا وحتى اخواتى برضو ليهم نفس وجهة النظر بس للاسف هيعملوا ايه فاكرين هيقدروا يعلموا حاجة فى الحزب او فى فكر الناس ده طبعا صعب اوى وخصوصآ فى الظروف الحالية من رابع المستحيلات

بس طبعا مفيش حاجة بعيدة عن ربنا

ربنا يـولى من يصـلح

اما بقى الدائرة التانية اللى هى هتكون طحن فى الاعادة على الرغم الصراع الوطنى ضد الوطنى بس الصوت الاعلى للعصبية برضو والنفوذ وربنا يستر ويعدى برضو على خير

معلش بقى طولت عليكم

تــاجـين مرة واحـــدة

2007-06-04T12:25:00.000+03:00

التيجان اللى مش بتخلص اصل اللى بيعمل أسئلته عايز يعرف الاشخاص دى ايه لانه طبعا مش قادر يتواصل مع الكل ولانه عالم افتراضى فبيحاول يفهم الاشخاص من خلال هذه التاجات ولا التيجان الا صحيح من فيهم الجمع الصح اصلى بليدة فى اللغة العربية وبليدة فى كل حاجة ههههههههههههههههههه

وطبعا بمـا انا هذا التاج من أســــتاذنا
عصفور المدينة
فلازم أعمله علطول وكمان التاج لذيذ وغريب فى أسئلته

وبما اننى مش فاضية وكالعادة هأعمله وكانى بيجرى ورايا لامؤاخذة كلب اصل عندى فوبيا منهم وقال كمان فى ناس بدافع عنهم يا سبحان الله

انت مين؟

أنـا أمانى بنت الجنوب علشان اللى ملوش جذور ولا اصل يبقى بلا هوية وبلا اى شئ يذكر وكمان مختارة صورتى تعبر عن اسوان الطبيعة لان اسوان مش معابد ولا سد ولا خزان اسوان بشكل النيل فيها والطبيعة حتى لو كانت قاسية

مين أكتر ست أشخاص بتحبهم؟

لا بقى مش قادرة اعدهم هاكرر العدد مرتين معلش بقى انا عارفه انى غلسة

بابا الله يرحمه

ماما ربنا يخليها ويديها الصحة ويبارك فيها يـاااااااااارب آمــــــــــــــــــــين ويقدرنا على خدمتها وطاعتها

اخوانى الصبيان الله عليهم قد ايه طيبين ربنا يكرمهم ويعزهم ويباركلهم فى عيالهم وصحتهم ياااااارب آمـــــين وأخى أبـومنـه والله زى اخواتى بالظبط ربنا يكرمه ويبارك له فى اهل بيته يااااارب آمـــــــــــين واخواتى بأحبــهم اوووووووى ربنا يخليهم ويكرمهم ياااااااااارب آمـــــــــــــين

وعماتى وخالتى وكل اقاربى بأحبهم اوووووووووووى اوعى حد يسنى صلة الرحم وسط زحمة الروتنين والحياه الممله وطبعآ صديقاتى اللى شوفتهم وعاشوا معايا واللى عمرى ما قابلتهم على ارض الواقع ومينفعش يتعدوا احسن حد يحسدهم ههههههههههههههههه

انت سعيد؟

مين سعيد ده أنا امانى ههههههههههههههه رخمة عارفه لازم اكون رخمة مش أمــانى اصله سؤال غريب استحالة يكون فى سعادة مطلقة ده طبعا من رابع المستحيلات هنقول هل انت راضى والله بأحاول اعيش الرضا وعايزة ربنا يرضى عليا فى الاول علشان احس بالسعادة وحتى لو مش سعيدة بأحاول اعيش السعادة لان الحزن والكآبة بأكرهم وكمان مش ذنب الناس انهم يشوفنى كئيبة وكمان الرسول نهى عن الحزن فلازم نقتضى بحبيبى اشرف الخلق سيدنا محمد عليه افضل الصلاة والسلام

لو اجتمعت أنا وحسني مبارك في غرفة واحدة؟

ها احكليه عن حال البلد ربما ميكونش عارف كل شئ جايز وهاقوله انا خايفة عليك من عقاب ربنا والحق فوق

لو معاك مليون و نص جنيه تعمل بيهم ايه؟

والله مش عارفه اصلى بصراحة مش بأحبه اكيد هالف كل اللى اقدر عليهم واجبلهم اللى نفسهم فيه لانى الحمد لله مش فى حاجة ليه وححاول اجيب عالج لناس كتيرة محتاجة وكمان للناس اللى بيشحتوا اقدمله بيه فرصة عمل علشان نرحمهم من ذل المـسألة

بتحب مصر؟

نفسى اكرها لانى تعبت من حبها ومخلية اللى حوالية محسسينى انى مجنونة وانى عايشة فى الاوهام بجد بقى نفسى اكرها

بتحب البنات؟

بصـــراحــــة مـــش كلهم

احب البنت الهادية الرقيقة اللى عايشة على طبيعتها

ومش بأحــب اصحاب النظرات الحادة حتى لو كانت طيبة اصلى مش هاعرف الناس كلهم وكمان ام صوت عالى أخيييييييييييي عليها واللى معندهاش حياء والحمقاء والســاذجة

انت مسلم؟

الحمدلله

ليه؟

بالوارثة مســلمة من اب وام مسلمين وكفى بالاسلام نعمة وبحمد ربنا عليها بس نفسى أبقى مسلمة بجد واكون اقوى من كده واتعلم اكتر علشان اقدر ارد على الناس اللى مزاجها تغلط فى الاسلام

تاج 2مين أكتر شخصية متقدرش تستغنى عنها في حياتك؟

مش بمزاجنا

و ليه؟

لان الحياه كده ومش بتوقف عند حد معين بالعكس هتمشى هتمشى وكمان انا اتعودت على كده من بدرى اوووى ولازم اكيــف نفسى و حياة الغربة وما قبل الغربة وبابا الله يرحمه عودنى ازاى اكون قد المســئولية فى كل شئ

ايه أكتر موقف محرج تعرضت ليه؟

يييييييييه كتــير والواحد ميقدرش يعدهم بس اكتر موقف كان حاسة روحى هتطلع بس عدى خير كانت معايا واحدة زميلتى جاية معايا فى القطر وهى حولة وكانت عايزة تعرف واحدة معانا فى السكن برضو حولة وانا قعدت اوصفهالها كتير وهى مش عارفه روحت قولتها وانا بأشاور بايدى على عيناها بس سبحان الله هى فى اللحظة اللى ايدى بدأ يتحرك رفعت عيناها وقعدت اتهته فى الكلام قالتلى مالك

و اتصرفت ازاى

قولتلها الاسلاك ضربت فى بعض ودخلت على موضوع تانى

يه الأمنية اللى بتدعى دايما ربنا انه يحققها ليك؟

والله كتير

هاقول واحدة بس

اللهم ارزقنا حســـن الخاتمة وادخلنا الجنة
و اتحققت ولا لسة

مين فيهم بالظبط اصلهم كتير

ولا واحد لغاية دلوقتى بس ربنا كريم

وكــل شئ بأوانه

امرر التاج لمـــين كالعادة لكــل الناس واللى معلمش اللى بعته له قبل كده وقال الظروف لما ظروفهم تخلص يبقى يعملوه

هو عنده امتحانات ربنا يكرمه ويوفقه يــااااااااارب آمـــــين

الباشمهندس مـا عليـنا

الدكتــور لما يرجع بالســلامة من المهمة اللى هو فيه

الدكتور سكتم بكتم

والباشمهندس خالد لما يفضى

الباشمهندس خالد حواديت

ونـــدى لما تفضى

حبيبتى وعيونى ندى

وقطتى لما تخلص أمتحانات ربنا يكرمها ويوفقها يااااااارب آمــــــــــين

عاشقة الوطن

ومرمر كده النهاردة خلاص اخر يوم فى الامتحانات ربنا يكرمك يارب آمــــــــين

مرمر بتاعت التخاريف

والباقين بقى فاضيين فيبقى لازم يعملوه

الصارم الحاسم

مش أنا

فكرة مصرية

الطائر الحزين

أمام الجيل

ريـمـــــــــــو

الاغلبية الصامتة
وكـــــل تــاج وأنتــــم طييبن

الـهويـــة الــضائعـة

2007-05-30T18:08:00.000+03:00

لارجاع الامانه

قررت رفع الموضوع ووضع لينك ووضع التعليقات عليها برضو

مدونة أخى ابو منه بعد فتح مدونته

البردية لأبومــــــنه

الحمـــدلله

2007-05-30T15:02:00.000+03:00

الحمــــدلله على كل حال واعوذ بالله من حال اهل النار

ازاى نتعلم نفرح حتى لو حاجة مش كبيرة لازم نفرح ونحاول نطلع من الحزن اللى احنا فيه و لما يكون عندك حاجة تفرحك او تخليك تكون مبسوط أنبسط حتى لو كان سبب صغير اوووى والناس شايفها انها متفرحش او ما تكونش سبب للانبساط لا برضو افرح وانبسط أصلى مش باحب التكشيرة اصل اللى بيكون كشرى وشه بياخد التكشيرة حتى لو ضحك بعد كده استحالة مش بتعرفه بيضحك ولا زعلان زى مدرب الكورة المشهور " ح . ش " انا هاتكفى برموز

الخبر الاول

اللى فرحنى اوووووووووى وكنت سعيدة بالخبر اووووووى خبر حجاب اختى وحبيبتى وعيونى والمقربة الى قلبى ربنا يثبتها يااااارب آمـــــــــــــــــين

الخبر التانى

الفوز بالجايزة

والخبر بالتفصيل فى مدونة الدكتور سكتم بكتم وهى عبارة عن شيكولاته وطبعا لبعد المسافة انا مش هأقدر اخدها يبقى خيرها فى غيرها ولا اخدها فى الشبيسى ودى بصراحة اول مرة اكسب جايزة

تحــــياتى للجمــــــــــــــــــيع

تــــــــــاج

2007-05-24T17:58:00.000+03:00

كل شوية تاج وبعدين بقى ايه الفال الوحش ده كلنا بقينا ملوك يا عينى يا عينى

وبصراحة انا وباكتبه مخنوقة على الاخر لانى كنت خلصته ورجع اتمسح أهئ أهئ أهئ قال يعنى فاضية علشان اكتبه من جديد يلا الحمد لله على حال واعوذ بالله من حال اهل النارالتاج ده بقى المره دى من ريـمـــــــــــو والباشمهندس مـا عليـنا

أحب شخص لقلبك في الدنيا؟

بابا الله يرحمه وماما واخواتى وناس تانية كتيرة اوووووووووى ومينفعش افضلهم ولا افرزهم واقولهم واحد واحد

انسان مستعد تضحي بحياتك – ركز فى كلمة حياتك – عشانه؟

ماما واخواتى وكل اللى بأحبهم

انسان كرهته لدرجة الجنون و تمنيت لو تمسك سكينة وتنقض عليه وتغرزها فى قلبه تقتله وتقف تبص لجثته وتشفي غليل قلبك؟

صعب اوووى موضوع الكره ممكن الواحد يتخنق يأضايق وخصوصآ من اللى يكدب عليا ولو عمل ايه ابدآ مش بأصدقه تانى واتخنق اكتر من اللى يستغلنى بس اكيد طبعا بأكره الامريكان والصهانية على الاخر خصوصآ بعد كل نشرة اخبار الكره بيزيد عندى

ما هو اسم اجمل كتاب كتبه بشر قراته ومحتفظ به حتي الان؟

الفتنة الكبرى لطه حســــــين وكمان عبقرية صديق لابن أسوان عباس محمود العقاد

بس ممكن سؤال هو الكتب بيترمى ولا ايه ممممممم

اسم كتاب كتبه بشر برضة- انت متعلق بيه وبتقرأه كل فترة؟

فن الذكر والدعاء عند خـاتم الانبياء لمحمد الغزالى باحب اقرأها من فترة لتانية لو حاسة نفسى مش بأدعى كويس او بأصلى علشان اتعودت

اهم جهاز منزلى انت متعلق بيه او بتستخدمه كتير؟

المكواه طبعا لانى يوميــآ لازم أسلم عليها يا الصبح يأما باليل اصلى هطلع مكرمشة ههههههههه والتكييف بما اننا فى فصل الصيف اللى مفيش بينا حب خاااااااالص وهو عارف كده كويس مش بأحبه والكمبيوتر فى الاخرلاننى لازم اخرج يوميــآوطبعا لازم يكون بعد التكييف لان لو الجو سخن اووووووى بيفصل ياعينى بيكون بيموت ههههههههههههه

مكان تحس بالراحة عندما تدخله؟

بيتنا اللى هو دلوقتى فندق للنوم فقط

شىء تحس بالراحة النفسية عندما تنظر اليه؟

الميـــــاه الزرقاء والخضره بأحبهم اووووى وخصوصآ مية النيل لانه هادى مالوش صوت علشان مفيش طبعا أمواج سبحان من خلق وصور ســـبحان الله

مكان تحس فيه بالحنين الى شىء لا تدرى ماهو و ذكريات جارفة الى لاشىء؟

بيت عمتى الله يرحمها ما اجملها ذكريات وخصوصآ انا وهى كنا اصحاب اووووووووى الله يرحمها ويرحم امواتنا واموات المســـــــــلمين

اجمل مدينة زرتها داخل مصر ؟

فى غيرها أســــــــــــــــــــــــــــــــــــــــــــــــوان بلد السد والخزان نرجيسية بقى ههههه وغلاسة

أجمل مكان طبيعي رأيته داخل مصر ؟

منظر النيل خصوصا لو قعدت فى حديقة فريال هتشوف النيل والجنادل الله الله سبحان من خلق وكمان وراها جزيرة الفتين ( جزيرة اسوان ) وبما فيها من نخيل ومزورعاتبس للاسف باقلى فترة طويلة مش باروح اى حته أهئ أهئ اهو اللى اخدناه من الشغل

شخصية كارتونية بتحبها

توم وجيرى في غيرهم لحد الان بأسمعه

انوع هاتفك المحمول؟

حبيب الوطنى العربى اللى بيتهألى ممكن يعملوا مظاهرة لو اتمنع من السوق اكيد طبعا الكل عرف هو ايه

سرعة بروسيسور جهازك؟

لما أســـال مهندس الكمبيوتر

حجم ذاكرة –هارد- جهازك؟

تقريبـآ 80 جيجا

المساحة التى تشغلها المواد الاسلامية على جهازك؟

والله حاليآ الويندوز ضارب كالعادة والله الجهاز بيصعب عليا مطلعة عينه

أهم هدف انت واضعه لحياتك الآن؟

الحـــــق أحــــــــــــق ان يتبع

مواصفات فتى الأحلام بالنسبة لك؟

احلام ايه بس هو احنا لسه هنحلم ههههههههههه

ايه يا جماعة احنا فى جريدة الجمهورية ولا ايه يعنى لو قلنا الموضوع هيجيب همه ولا لاء على العموم مش هأقول حاجة من العشرين صفه الاصفة واحدة

يتــــــــقى الله فى كـــــل شــــــــئ

صف ما يأتى:

شعورك لما بتسمع كلمة مصر ؟

الشعوربالخوف عليها لانى باحس انها حتة منى وانا حته منها باخاف عليها كل ما اسمع خبر مش كويس باخاف عليها لم اسمع الفساد فى كل حتة باخاف من كل حاجة لانها بجد غالية عليا اوووووووووى

شعورك لما بتسمع كلام عن اليهود؟

الاشمئزاز

بأفتكر سيدنا زكريا وسيدنا يحيي وبافتكر سيدنا موسى وعيسى عليهم السلام والفتن ضد اشرف الخلق ســـيدنا محمد عليه افضل الصلاة والسلامده طبعا غير بحر البقر والاسرى المصريين ودير ياسين وصبرا وشاتيلا وجنين وغزة ولبنانومفيش حد سلم منهم مش بأحبهم وضدهم وضد كل واحد يتعامل معاهم يعنى من الاخر عنصرية

شعورك لما بتشوف ظابط شرطة؟

بـــأضحك

لانى الحمدلله بأخد حقى تالت متلات

وكمان بيصعبوا عليا لانهم ناس أضحك عليهم على فكره هم مطحونين على الاخر

شعورك لما بتشوف الكناس العجوز فى الطريق؟

ربنا معاه ويكرمه ويديه الصحة ويرزقه ويبارك فيه

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف؟

ليه ميكونش السؤال شاب لابس لبس غريب وعامل شعره مش عارفه ايه

نقول بقى شعورى ايه زمان بصراحة كنت بأخافهم اوووى يمكن علشان الاعلام كان بيوصل صورة ما يعلم بها الا ربنا بس كان فى اســـتاذ فاضل كان منهم بصراحة هو افضل مثال للناس دى لانه بأخلاقه غير الصورة دى تمامآ وكان بيقولوا لنا الناس بتخاف منهم ليه ووضح الصورة طبعا وكان له دور انى مأ خافش منهم اكيد فيهم الكويسين اووووى والاقلية اللى داخلين غلط وعلشان هدف لشئ فى الدنيا سبحان الله بيبان علطول

ربنا يثبتهم ويبثت كل المســــــــلمين

احساس يراودك فى اشارة مرور مغلقة بسبب مسئول كبير؟

باقول مع نفسى هيروح فين من قضاء الله

اختى وحبيبتى رفقة قالتلى لازم تعملى التاج وحتى فكرة الالوان دى اخدتها منها لانى بصراحة ماليش صبر الون كل كلمة وخصوصآ مفيش فى الصفحة دى مميزات زى الوورد علشان الوقت بس الحمدلله وكنت ناوية ابعته التاج لحبيبتى وعيونى ندى فالقيتها عملتها فهى معافاه من هذا التاج

بما انى عانيت لغاية ما كتبته فلازم يعدى على كل مدونة بازورها واللى عنده امتحانات يبقى بعد الامتحانات وربنا يكرمهم بــالنجــاح والتوفيق لان بقى اللى مش هيعمله هو حر ذنبه على جنبه عريضة الدعوى هيكون بكره على باب المدونة
والتاج هيكون من نصيب كل من التالى أسمائهم

الباشمهندس حسن محمود يتصرف حتى يستلف مدونة براحته بقى يعمل مدونة يبقى يا باشمهندس تتصرف الجيش بيقول تتصرف

عصفور المدينة

الصارم الحاسم

الاستاذ محمد
الباحث عن الحقيقة

نسرين حبيبتى

باشمهندس عيون

حواديت

حائر فى دنيا الله

حواديت وخزعبلات

هوندا

فكرة مصرية

كراكيب عادل

مرمر بتاعت التخاريف

ابن ناصر

لماذا نرحل

نوارة

غزالى

دكتور خالد

صرصارة

الطائر الحزين

أمام الجيل
صاحب البوابة

خمسة فضفضة
ابن اسوان دكتور المستقبل

تحديث

والباشمهندس علاء مش أنا

هل فشل ام نجح الحزب الوطنى

2007-05-21T19:30:00.000+03:00

هل فشل الحزب الوطنى ام نجح فى اختياره لمرشحينه فى عضوية مجلس الشورى ام هى لعبة جديدة فى الحقيقة لا افهم كيف يعزز الحزب الوطنى وجوده على حساب اهالى اسوان كيف ياتى بأثنين مرة واحدة على الرغم أنه من المعتاد ياتى بواحد فى حادثة لم يحدث من قبل لانهم سوف يتنافسون على مقعد واحد فما موقف العائلات و القبائل من هذا الانتخاب

قبل ان يفهمنى احد خطأ أننى لست بعضوة فى الحزب الوطنى بل اننى اتحدث عن طبيعة بلدى لان الحزب الوطنى عندهم الاساس و ليس سياسة وانما هى واجهة ومكان شرفى ومنظر لا اكثر من ذلك فقط لانه لو تغير الحزب وبقى حزبآ اخر فهؤلاء الناس هم اول من يسارعون للانضمام الى غيره من كان له الصوت الاعلى فى المجمع الانتخابى صوت العصبية القبيلة ام النفوذ ام المحافظ

لماذا يلعب الحزب الوطنى على هذا الوتر بالذات وهى العصبية القبيلة هل خائف على صورته ام يريد الاحتفاظ بأعلى صوت له فى هذه الانتخابات

طبعا النتيجة جاءت على غير العادة وغريبة وجاءت بمرشحين غير مرغوب فيهم وذلك بسبب تدخل المحاقظ

ولكن يبقى الامل يراودهم لان المرشحين الاثنين من اكبر القبائل عددآ فى السكان وكما يشهد لهم الجميع انهم اكثر من يخرجون للتصويت

ماذا تحمل الايام القادمة

سننتظر

رسالة الى الامن المصرى

2007-05-15T14:04:00.000+03:00

لمـــاذا لا يتم حجب هذه المدونات التى تتطاول على رب العرش العظيم وعلى رسولنا
الكريم والصحابة وامهات المؤمنين عليهم رضوان الله

حتى لا تجعلوا منى ارهابية اقفوا سبابكم ضد رب العرش العظيم ورسولى عليه افضل الصلاة والسلام لم نجبر آحدآ على دخول الاسلام فلماذا تسخروا اوقاتكم وانفسكم لتفننوا فى ايذاء رسولى عليه افضل الصلاة والسلام واصحابه عليهم رضوان الله

لماذا تفرغتوا لإيذاءنا وجرحنا دائما وابدآ

انا لا استعتطفكم لاننى قررت ان اكون ارهابية فى وجه كل من يتطاول بسب رب العرش العظيم و رسولى الكريم عليه افضل الصلاة والسلام

انا لا احب اللون الاحمر ولكن قررت الكتابه به دليل على الثار لكل من يتطاول

لان هذا ليس بحرية راى او تعبير

كنت اعترف بحرية التعبير والراى ولكن بعد ان علمت انكم اصغر ما يكون من هذه الحرية

إذن

حريتك تنهتى حينما تقوم بجرحى والتطاول على ربى وعلى رسولى الكريم عليه افضل الصلاة والسلام وعلى دينى ومقدساتى

ابتعدوا عنا

حتى لا تجعلونى ارهابية

بــــدو ســـيناء

2007-05-06T17:39:00.000+03:00

مش عارفه ابدأ بس لازم اتكلم بقالى ايام وليالى عاملة الف وادور فى المدونات عايزة اشوف حد افتكر بدو سيناء للاسف الشديد لا ليه مش عارفه يعنى ايه احنا والحكومة والزمن عليهم

اننى لست بعالمة ولا خبيرة ولكننى اتكلم عنهم من وجهة نظرى الشخصية لاننا تقريبا كلنا منسيين فى بلدنا

واصعب شئ عندما يحسوا اشخاص على ارضهم انهم ليسوا لهم الحق فى وطنهم هذا ما حدث معهم ليســـوا لهم الحق فى اى شــــئ يذكر

على الرغم من انفراج الازمة التى انتهت بهدنة مؤقتة الا اننى مازلت حزينة اوووى ومستغربة اكتر من اسلوب الدولة اللى احنا عايشين فيها ليه بتهتم بحاجة معينة وحاجات تانية لا ليه بتهتم بمناطق معينة ومناطق تانية لا لما هى اصلا مش قادرة على مصر ومصر كبيرة وواسعة ما تسيبها نعمل اللى احنا عايزاينها فيها

بدو سيناء المنسيين فى كل شئ فعلا ناس خارج الخدمة لم تهتم بهم الحكومة على مدار السنين هل هما فى نظر الحكومة ابناء غير شرعيين لهذه الدولة هم ليسوا لهم الحق فى الالتحاق بمناصب الدولة هل هم ليسوا لهم الحق فى الالتحاق بالشرطة والجيش ما السبب الرئيسى فى ذلك لقد سمعت كثيرآ من الناس انهم مينفعوش علشان هما جواسيس دا كلام

لما احنا كلنا نسينا اهل سيناء وماذا حدث لهم مع هذه الحروب وهما الذين يدفعوا ثمن الالغام وسط الصحارى لماذا لم يفتكرهم احد لماذا لما نقف جنبهم لماذا لم نسمع على مظاهرة تضامن معهم بعد طابا ودهب لماذا نحن صامتون هكذا هل هم ليسوا باخواننا لا اعرف

حتى اعلامنا الساذج الذى لا اعترف به لم يفتكروا و لو لمرة واحدة بدو سيناء ومشاكلهم

بدو سيناء الحكومة نسيت فى ناس هناك وهم اولى على الاقل باقل القليل فى زراعة هذه الارض وبرضو الحكومة نسيت وعملتها كلها منتجعات سياحية طب هم فين وكمان الحكومة نزعت هويتهم باعمالها معهم على انهم ليسوا لهم الحق فى اى شئ لماذا كل هذا الظلم

الفرج قريب باذن الله

يــارب

2007-04-30T13:38:00.000+03:00

يــارب لقد ضاقت بى الدنيا بما رحبت فلمن الجأ والى من اشتكى لا احدآ سواك يارب وكنت لا اريد ان اتحدث ولكن قد يوجد بينكم الصالح ودعوته يستجاب كماقال
رسُول اللَّه صَلّى اللهُ عَلَيْهِ وسَلَّم كانَ يقُولُ : (دَعْوةُ المرءِ المُسْلِمِ لأَخيهِ بِظَهْرِ الغَيْبِ مُسْتَجَابةٌ ، عِنْد رأْسِهِ ملَكٌ مُوكَّلٌ كلَّمَا دعا لأَخِيهِ بخيرٍ قَال المَلَكُ المُوكَّلُ بِهِ : آمِينَ ، ولَكَ بمِثْلٍ) رواه مسلم
الحمــد لله على كل حال واعوذ بالله من حال اهل النار
والحمد لله الذى لا يحمد على مكروه
واننى اعلم جيدآ
ضاقت فلما استحكمت حلقاتها فرجت وكنت أظنهـا لا تفرج
اننى فى حاجة الى دعوة صادقة مخلصة ارجو الدعاء لى ولأخواننا المســلمين فى مشارق الارض ومغاربها
" لا اله الا انت سبحانك انى كنت من الظالمين "
" ربنا ظلمنا انفسنا وان لم تغفر لنا وترحمنا لنكونن من الخاسرين "
" يا حى يا قيوم برحمتك استغيث أصلح لى شأنى كله ولا تكلنى الى نفس طرفة "
يــااااااااارب كــن مــعانـا ولا تكــن عليــنا ربنا لا تســلط عليــنا بذنوبنا مــن لا يخافك ولا يرحمنــا"
"اللهم إنى عبدك إبن عبدك إبن أمتك ناصيتى بيدك ماضى في حكمك عدل في قضاؤك أسألك بكل إسم هو لك سميت به نفسك أو أنزلته فى كتابك أو علمته أحدا" من خلقك أو إستأثرت به فى علم الغيب عندك أن تجعل القران العظيم ربيع قلبى ونور صدرى وجلاء حزنى وذهاب همى
اللهم يا مفرج الكروب فرج كربى وكرب المكروبين
ســامحونى لاننى ضايقتكم واثقلت عليكم

بأفكر بصوت عالى

2007-04-21T21:37:00.000+02:00

بأفكر بصوت عالى

عايزة حزب على مقاسى لانى ضد الاحزاب من نواحى كثيرة انا عايزة حزب يكون مع دينى وعقيدتى ويحترمنى ويقدرنى ويقدر شعب كامل ومش عايزة كلام مكلكع لانه مش بيجيب ولا بيودى بالعكس بيخلى الواحد قاعد فى مكانه

القانون اتغيير وفى فرصة كويسة للمرأة ليه مش عارفه على الرغم انه على راى المثل ولا هنحل ولا هنربط بس اهو فرصة ولازم استغلها يمكن افيد ولازم الواحد كمان يكون فى حزب علشان يقدر يخوض الانتخابات وانا كنت ناوية انزل محليات حاجة على ادنا كده وكمان فرصة

النجاح فيه كويسة وبما ان الانتخابات هتكون بالقوائم فلازم اشوف حزب ازق فيها نفسى قعدت افكر مش لاقية على الرغم احد الاصدقاء من حزب التجمع قام مشكورآ وكلم المسئولين فى الحزب وبرضو اخويا بقى فى الحزب الوطنى قالى ادخلى معانا وطبعا حتى الان لم اتخذ اى قرار

ماذا افعل هل ابعد واقعد اندب حظى ان مفيش حزب على مقاسى

مش كفاية اللى احنا فيه

2007-04-18T21:26:00.000+02:00

مش كفاية اللى احنا حتى فريقى المفضل واجع قلبى بجد تعبت لانى بقيت بأتكسف اقول انى زملكاوية

خلاااااااااااااااااااص مش هأشجع حد تانى وكفاية لغاية هـنا

كل يوم هزيمة كل يوم هزيمة ايه مش بتغيروا من باقى الفرق ولا نفسكم تغلبوا ايه ده

كانوا بيقولوا يا زمالك يا مدرسة لعب وفن وهندسة

ايه سبتوا التعليم وهربتوا ولا ايه

وباقولها وكلى أسف وداعــآ الزمــالك لن أشجعك بعد اليوم ولن أشجع اى فريق تانى خلاص

تاج جديد ومن نوعية خاصة

2007-04-11T14:15:00.000+02:00

التاج ده غير التاج اللى كان فى الاول التاج الاولانى من اختى رفقة اللى سافرت من غير ما تقول اللى بادور عليها فى المدونات دا كلام طيب مش تقولى ربنا يرجعك بالسلامة والتاج التانى من الاستاذ خالد حواديت

وبما اننا فى فصل التيجان اللى هو الربيع سابقآ

نكمل
بناءآ على طلب من الباشمهندس ما علينا انت تشبه مين من زعماء القرن العشرين

معذرة يا باشمهندس انا بقى هأخرج من الموضوع

هى بقى بالنسبالى فرصة كويس انى اتكلم على زعيمى المفضل اللى اغلب الناس بتكره معرفش ليه على الرغم انه بنى ادم واكيد له اخطاء ولكن فى النهاية على ما اعتقد انه عمل اللى يقدر عليه واكتر شوية و انا بالتمس له العذر لان كان حوله ناس مش كويسين وكمان الفترة اللى كان فيه المنطقة العربية وافريقيا كانت كلها تقريبا تحت الاحتلال وده طبعا غير الوضع الداخلى

الباشمهندس ما علينا كان عايز يعرف من الناس اللى مرر ليهم التاج الغريب ده نشبه مين لا انا مش شبه حد بس فرصة اقول انا بأحب مين ومين اقرب الى قلبى بأبسط الكلمات ومن فتاة بسيطة وابسط من البساطة

الرئيس الراحل جمال عبد الناصر رحمة الله عليه اننى احبه كده وخلاص معرفش ليه وهو افضل الزعماء بالنسبة ليا

شوفوا موقفه على الصعيد العالمى لم يخنع ولم يتراجع امام اى دولة علشان مصلحة شخصية وفى الداخل رجل خرج كما دخل خاوى الجيوب لم يأخذ مليم واحدآ

ويزداد حبى له لانه هو من اهتم بنا الجنوب المنسى دائما وخصوصا محافظتى الذى غير شكل الحياه به كان فى الماضى منفى ولكن بعد السد العالى ومصنع كيما هذا اكبر مشروعين ولازال حتى الان كل الجمهورية يستفاد منهم وطبعا بحيرة ناصر

وغير جامعة اسيوط الذى تخرجت منه هو اول من اقام جامعة فى الصعيد حرصآ منه على مستقبل الجنوب

كيف لا احبك يا جمال عبد الناصر

كان نفسى اجهز موضوع عن الزعيم الراحل جمال عبد الناصر رحمة الله عليه من وجهة نظرى انا وليس التاريخ اللى انا مش بأحبه ولكن من خلال اشياء ملموسة

تاج كوكتيل

2007-04-07T17:02:00.000+02:00

بما اننى اخر البلاد فطبعا التاج وصل متاخر على الرغم ان فال التاجيين دى مش كويسة بس يلا شكلكم كده عايزين الدولة تكون مملكة
انا بقى باقول عليه كوكتيل علشان ما اكسفش حد فأجمع الاتنين معآ
هل كنت طالب شاطر فى المدرسة ؟
سؤال صعب ومش حلو معايا بصراحة بقى لانى ما كنتش شاطرة اووووى يعنى كان شغال يعنى كنت بأطلع الثالثة الرابعة اجيب لورا بس مش بيجيب لقدام هههههه وكمان ده كان فى الابتدائية بس والاعدادية اما بقى الثانوية العامة دى كانت تحفة اوووووى اه عايزة ناس مخصوصة وليهم فى المذاكرة اما انا ماليش فى المذاكرة يعنى كلمتين وبس وخصوصا كنت داخلة علمى علشان الوالد الله يرحمه فطبعا ما جبتش مجموع فى ثانية قمت مغيرة علطول على ادبى اصلى مش هأضيع عمرى فى ثانوية عامة عايزة اخلص
ايه اكتر مادة حبيتها واكتر مادة كرهتها فى المدرسة والجامعة ؟
طبعا الرياضيات بليدة فيها بشكل فظيع اووووووى ومش بأحبها وكمان التاريخ ليه عندى احساس انه مغلوط معرفش ليه يعنى حاليا مصر فترة الرئيس مبارك هيكون ايه فى التاريخ مفيش حياد بصراحة يما ناس بتكره على طول الخط يما ناس بتمدح فيه علطول يعنى مفيش موضوعية
وباحب الجغرافيا لانها مادة حيه وباحب اووووووى الخريطة لو عايزة اعرف حتة وعايزة اعرف طبيعة اهلها اقوم قالبة على الجغرافيا علطول
الجامعة بقى الغربة والمرار والصحبة على حق والحرية على حق اللى مفيش حد يقولك رايح فين ولا جاى منين وبلد متعرفش فيه حد بس بصراحة عملتنى معنى الحرية اللى انا باحسها مسئولية كبيرة اووووى ايه ده انا خرجت من الموضوع بما اننى كنت فى كلية مالهاش اى رابط بكل اللى اتعلمته علشان كلية النصابين اللى هى الحقوق اللى مش مفيش حد منهم عارف يجيب حقه كنت بأكره القانون المدنى رغى رغى رغى ييييييييه مادة رخمة اوى الا فى تانية دبلر اه اصلى فى سنة كنت معيدة الدكتور كتابه كان رائع اصله كان تلميذ السنهورى وكمان المرافعات اللى تعتبر محور الكلية يا سلام صحيح محامية فاشلة
كنت عايز تتطلع ايه انت وصغير ؟
كنت عايزة اطلع سفيرة لانى كنت بأسمع الاخبار من بدرى اووى وكمان باحب الجرايد السياسية اوووى لان ده اللى كنت بألاقيها فى البيت واللى كانوا بيتكلموا فيه كنت فاكرة السفراء هما اللى بيحلوا المشاكل دى طلع اصلا مفيش حد بيحل حاجة خالص
وعمى الله يرحمه كان بيقولى يا دكتور ليه معرفش وبابا عايزانى مهندسة والحمدلله ما طلعتش منهم ولا حاجة خاااالص
طلعت محامية فاشلة هههههههه وفى الاخر سكرتيرة سبحان الله انت تريد وانا اريد ويفعل الله ما يريد
اسم مدونتى ؟ علشان كنت عايزة حاجة من الجنوب كنت بأدخل المدونات كلهم الاقيهم من القاهرة الاسكندرية امال فين الجنوب ايه هما دايما كده منسيين حتى هما نسوا انفسهم
الصورة؟ معنديش لانى مش عارفه احطها لغاية دلوقتى ههههههههه
احلى مدونة كل المدونات لذيذة والناس كلهم بيعملوا مجهود يعنى فى منافسة لذيذة اوووى
اسوء مدونة كل من يسب او يشتم وخصوصا اللى يسب دينى بجد بأكره وكل واحد يشتم وفاكر الشتيمة شطارة وانه شئ كويس لا ابدا بأكرهم وبأتخنق لانه بيدل على انهم خلاص مفيش اخلاق مش بيحاولوا يحترمو الناس

احلى بوست كتبته رحلة صعبة لان ده شئ حاسها وكنت بأتكلم فيها عن نفسى ناس كتيرة قراتها ومش فاهمة منها اى حاجة حتى صاحبتى اللى معايا فى الشغل قالتلى اللى يقراها مش هيفهم منها حاجة وفى اخ برضو قالى كلامه مبهم وناس تانية قالوا فكرتنى بالعبارة اللى غرقت هههههه وقعدت اقرأها اكثر من مرة لاقيت فعلا بس انا اللى فاهمها وكل اللى يشوفه ويقراها مش عارف ولا فاهم فى ايه فى الاسيبس قبل ما اغير الهوتميل وكمان تقيبل ايدى الوالدين

http://bentalganob.spaces.live.com/blog/

اما البلوج هنا انتو اللى تقولوا ايه الحلو
اكيد نسيت أسئلة معلش بقى اعذرونى
كفاية اوووووووى لانى بجد طلعت اكتر من رغاية

مســــــلســــــــل الكــدب والاســـــتفزاز

2007-03-29T14:25:00.000+02:00

مســـــــــلســــــــل الكذب والاســـتفزاز

بما ان مصر خلاص كلها بقيت مدينة الانتاج الاعلامى فعادى جدا يعنى التعديل الدستورى مسرحية والتصريحات مسلسلات

لا يوجد عندى كلام يتقال غير العنوان

ده خبر فى المصرى اليوم بتاريخ 27/3/2007

وطنى الجــريــــح

2007-03-28T09:33:00.000+02:00

وطنى الجريـــح
لا توجد كلمات لتعبر عن مدى حزني العميق على وطني الغالي وكيف ذبح في مسرحية بشــــعة ومخرجها يستأهل جائزة اوسكار في الإخراج ده غير التأليف السيناريو أأأأأخ يا وطني أما حان الوقت لكي تثوري أما حان الوقت لتقلعي ثياب الخوف أما حان الوقت لكي تقولي لا للظلم
الأستاذ حسن محمود مقاطع و كان مبســـــــــوط اوووووى أن اللجــان فاضية والأستاذ ما علينا مقاطع وعلى فكرة لو كنت شوفت البوست بتاعك قبل ما أروح التصويت أكيد كنت ها فكر من جديد على الأقل حفاظا على صحتي والأستاذ خالد محبط يعنى تقريبا برضو ما راحش والأخت تسنيم مقاطعة والأستاذ حنتكلم كان مقاطع والمعارضة مقاطعة والدينا كلها مقاطعة وكان وجهة نظركم أنكم تفضحوا الحزب الوطني اللي خلاص مش بتفرق معاه الفضيحة ولا بتفرق معاه اى شئ

اســمعوا أخر استـــفزاز رجــال الحــزب الوطني كل من لما يذهب فهو مفوضنا يعنى إيه !!!!؟؟؟؟
يوم الاثنين الموافق 26 مارس من سنة 2007 يوم أســــود في تــاريخ مصـــر التزوير علـــنا في كل مكـــان يوم ذبح مصر
تجربتي مع المزورين أنا بقى روحت وقولت مينفعش المقاطعة علشان ماحدش يصوت مكاني ويزور بأسمى المهم اللجان فاضية تماما ألا من رجال وشباب وفتيات الوطني وبعض من أتوبيسات وسيارات إحدى الشركات بهم موظفين أكيد منتظرين قرب انتهاء علشان يصوتوا مكان كل من لما يذهب على رأيهم البيت عندنا كلهم راحو بدري الاســتفتاء أنا قولت أروح متأخر علشان تعبانة وكمان أشوف لو حد زور مكاني يبقى يومهم اسود من قرن الخروب المهم أول ما دخلت اللجـــنة تقريبا كلنا نعرف بعض لان اللجنة عندنا في القرية بتاعتنا اللي كلهم حزب وطني حتى بيتنا أهئ أهئ في واحدة من فتيات الوطني قالتلى يا أماني لغاية ما ادورلك على اســمك تصوتي مكان أختك لو مش جاية قولتها نعم !!؟؟ قولتها لا طبــعا المهم البنت خــافت وبتشوفلى اســـمى كان موجود داخل اللجنة ثلاث كشوف المهم حظهم النحس وربنا يفضحهم مرة واحدة وفى صوت واحد اهو اسمك يا امانى قولتهم نعم اسمى تلات مرات قالولى لالالالا ده من المفروض يكون بره وده مش عارف إيه قولتلهم ازاى والناس موقعين هنا مكان أسمائهم يعنى لو الكشف ده بره هيوقعوا فيه ليه قمت بقى عاملة دوشة وقلتهم أنا عايزة تلات ورقات كمان قالولى لالالا ورقة واحدة وقعدت اتخانق معاهم ورجال وشباب الوطني اتلموا عليا ليه كده بس الدوشة دي ما الدنيا ماشية مظبوطة قولتهم مظبوطة ازاى يعنى قولتهم حســــــــــبنا الله نعم الوكـــيل ده اللى قدرت اعمله

المهم في اقل من ربع ساعة أكثر من 13 تليفون لاخواتى الصبيان الحقوا أختكم عاملة فضايح دوشة الفضايح انى أقول كلمة حق :-( يارب ارحمني من عندك وقبل ما أوصل البيت كانوا عرفوا كمان لان التليفون في البيت برضو مش مبطل رن ما أصعبها لحظات الظـــلم و ازاى الناس البسطاء المبرمجين بيدفعوا عن الظلم ياااااااااااااه ما ابشعها لحظات حين تكون لوحدك ومفيش حد معاك وفى الأخر أنا اللي غلطانة منهم لله جابولى انتكاسة منهم لله
أخر تقاليع الظلم والفساد واستخدام النفوذ السيد عميد المعهد العالي للخدمة الاجتماعية ســــخر الموظفين الطلبة والطالبات للتزويرفى أكثر من لجنة للوافدين وصوتوا أكثر من مرة .
يا وطني الجريح لقد اقترب النهاية وأكيد هيجي الساعة واللي هنكسر فيها كل الحواجز ولكِ الله يا وطنى الجريــح ولنا الله

2007-03-26T10:25:00.000+02:00

ماحدش يلومنى
بجد ماحدش يلومنى ولا يعتب عليا تخاريف مرض حرارتى تعدى الا40و قالونى كدا ينفجر من الغيظ والكبت والحزن والازدواجية اللى انا فيها ماحدش حاسس بأى حاجة ولا حد عارف ان فى تعديل دستورى واننى الاقى كل اللوم على المعارضة لان الحزب الوطنى عندنا عمل شغل جامد اوووى يمكن على مستوى المركز والقري لانهم هما فقط المهتمون بالانتخابات والاستفتاء مش علشان هما بيفهموا لا ابدا علشان هما ليهم اولادهم فى الحزب الوطنى وكمان العصبية القبلية اصل احنا ماعندناش معارضة ولا تنيظمات ولا اخوان مسلمين ولا غيره والمعارضة اللى موجودة بقى على مستوى الجمهورية اخرهم ايه يقعدوا مع بعض يقولوا كلام مكلكع اه لو واحد جديد معاهم عايزله سنة علشان يفهم واللى ما حد فيهم تعب نفسه وحاول يتكلم على الاقل مع خمس اشخاص يقولولهم الدنيا بتحصل فيها والتعديل الدستورى ايه ومخاطر بعض المواد ايه احنا بقى الناس عندنا هتنزل وهتقول نعم اه والله بجد لانهم اتصلوا بيهم فى بيوتهم وعلى راي الست يابنتى كتر الف خيرهم انهم قالوا لنا ان فى استفتاء بجد بقى المعارضة فين مش كان الافضل انهم ينزولوا من برجهم العاجى على راي الاخت ندى انا اللى بقالى سنين بأقرأ فى الكتب يادوب بأفهم شو لبيرالى مش كان الافضل تروحوا للناس اللى مش فاهمين وفى حاجة كمان مين ده اللى مقاطع ما طول عمره الشعب مقاطع بتعرفوا تقاطعوا الانتخابات بس حاجة تانية لا ليه مش كلنا نطلع ونقول لا يعنى هيزور كام بجد بقى ممكن اعرف ولو المعارضة اتفقت مع الحكومة زى ما بيتفقوا معاها على بعضهم اه ما ده اللى حصل فى الانتخابات الاخيرة بعض من المعارضة اتفقت معاهم لاسقاط اخرين ان يكون فيه مشرفين من المعارضة على الاستفتاء انا عارفه كويس ان التعديل طبخة وحشة اووووى وطعمها اوحش بكتير من العلقم والحنظل بس على الاقل نكون عملنا اللى علينا بس هنقول ايه
هنستنى ايه من معارضة افرزت فى ظل نظام فاسد طيب اللى بتقولوا قاطعوا كام واحد منكم يعرف لجنته ورقم قيده والمعارضة اللى بيقول قاطعوا جهز نفسه لانتخابات الشورى ولا لاء اصل كده خلاص التعديل الدستورى انتهى واللى كان كان يعنى حد منهم راح للناس وعملهم بطاقات انتخابية اصل ممكن ما يكونش اسمه نازل واللى اسمه نازل ميعرفش مكان اللجنة فين شوفت الحلاوة اللى احنا فيه مش كان الافضل اننا نجهز انفسنا علشان البلاوى الزرقا اللى بنشوفها وبدلا من تحمل المسئولية
وفى النهاية انا مقتنعة بشئ واحد صوت مين اللىصوته بيتزور اللى هو مش بيروح ومتاكدين انه مش هيروح يعنى كدا كلنا مشتركين فى المسئولية وربنا هيحاسبنا لاننا لم نعلم الناس ولم نتحدث اليهم وكمان فى الاخر هيزور صوتك
بــجد بقى ماذا لو خرجت كل الناس وقالوا لا اكيد هيفرق ومش هيكون فى تزوير لانه لو زور هيزور كام صوت هيرموا كام صندوق فى الترعة ولا حتى النيل مش هيتعرف
على فكرة انا مش قادرة ارجع والله تعبانة وفاتحة عينى بالعافية اكيد فيها اخطاء وكمان داخلة دايل أب من البيت يعنى ما صدقت الصفحة حملت معذرة
هأنزل اصوت وأقول لا

لا لمقاطعة التعديل الدستورى

2007-03-22T18:05:00.000+02:00

لا لمقاطعة التعديل الدستورى لازم بقى الكل يروح ويقول لأ يبقى بقى لازم نروح لان بقى التزوير بيجى لما احنا نقعد وما نروحش طيب ما فى ورق زيادة يعنى يترمى ونهدر المال العام
انا بقى مش هأسمع كلام حــد ونقول حجج علشان ما نروحش لا بقى هنروح علشــان نقول لأ لمرة فى حيــاتنا
الكارثة الاكبر فى بعض من رجال المعارضة ومش هأقول اسمائهم نايمين فى الحزب الوطنى فى اسوان

ويرجع ويقولك الاخوان المسلمين عاملين مش عارف ايه مع الحكومة ما كفاية بقى كدب على انفسكم

وفى ناس زعلانة اوووى من التعديل الدستورى مش علشان باكيين على البلد لا أبد

و كمان الناس اللى هما اصحاب الحوار المتمدن قال ايه عامليين حملة توقيعات علشان المدعو نوال السعداوى اللى مش عارفه مين اللى مديها الحق انها تتكلم عن مشاكلنا والتوقيعات لنوال تعدى الخمسمائة صوت والعريضة اللى مقدمة للامم المتحدة علشان الاسرى اللى راح دمهم هدر اللى ما فى واحد منهم تعب نفسه ووقع يبقى دول خايفين على البلد لا طبعا

كفاية كده لان اصلا كلامى مش مرتب ولاعايزة ارتبه لان بجد
دماغى هيفرقع وعندى صداع صداع صداع

أســـــرانا

2007-03-22T17:20:00.000+02:00

يعجز اقلامنا وتحشر اصواتنا وتدمى قلوبنا وتدمع اعيونناعلى اسرى 67
اسرى 67 هما اباءنا واخوالنا واعمامنا وقد يكونوا اخواننا ومنهم اجدادنا
انا عارفه ان هذا الموضوع هى هوجة فى المدونات والجرائد كانها حدثت بالامس هل كنا فى حاجة لتذكيرنا ؟؟؟!!! هل نشكر الصهاينة بسبب تذكيرهم لنا اننى اتعجب كثيرا على احوالنا
لماذا نحن هكذا
الاسرى المصرين اكبر من اى كلام يقال عنهم ولن نقدر على القيام بواجبنا نحوهم لأننا تأخرنا اكثر من تسعة وثلاثون عاما قرابة النصف قرن على دماء اسرانا التى ارتوت بها ارض سيناء وهى الان منتجع سياحى لاحفاد القتلة ومن يقوم بخدمتهم والسهر على راحتهم والحافظ على امنهم احفاد الاسرى هذا مصيرنا فى ظل تســـول السلام والارتماء فى احضان الصهاينة والامريكان والخنوع والذل والمهانة .
حكومتنا لها مصالح وبينهم اتفاقيات ومعاهدات اما نحن الشعب ما الذى يربطنا بيهم لا شئ فلماذا لا نقاطع منتاجاتهم وتكون مقاطعة شعيبة لكى نلحق الباقية من حقوقنا واهم حق هو عدم تحكم اى قوة فينا , ويكون لنا الصوت الاعلى فى كل المواقف وتكون ارادة الشعب اقوى من المعاهدات الدولية .
ونسرع جميعا فى حملة التوقيعات وتكون حملة المليون توقيع او على الاقل الاثنين مليون توقيع نــحن شعب نزيد على السبعيين مليون نسمة هل مليون توقيع كثير علينا لا والله هى اقل القليل
فنرفع شــــــــعار المليون توقيع للثأر لاسرانا .
اتمنى ان لا نسكت مرة اخرى والا صارت فعلا هوجة وانما تكون هى البداية لفتح باقى ملفاتنا مع الصهاينة ونكون اقوياء للضغط على
اسرائيل للتوقيع على المعاهدات الدولية لملاحقة مجرمى الحرب وكذلك للتوقيع على حظر انتشار الاسلحة النووية
العريضة المقدمة للامم المتحدة
http://www.petitiononline.com/egypows/petition.html

اسرة واحدة اخوة واخوات

2007-03-19T14:08:00.000+02:00

اسرة واحدة اخوة واخوات
كنت اتصور الا يحدث هذا ولكن حدث فعلا ولسه الدينا بخـير ومن هنا اوجه تحـية و نداء الــعودة .
لعاداتنا وتقاليدنا الجميلة التى بدأت تختفى فى ظل الظروف التى نعيشها والتحضر والتمدن الذى ضاع معهم كثيرا من تقاليدنا الجميلة وهو الحزن لحزن الاخر والفرح لفرح الاخر وازاى نزعل على بعض وازاى نكون اسرة واحدة اخوة واخوات بدون مقابل والا هى الحب فى الله وعدم جرح منا الاخر حتى لو كان بالالفاظ لاننا فى الاخر كلنا اخوه واخوات

تحية لاصحاب المدونات التى شاركت الاخت رفقة
حزنها على الدها رحمه الله واسكنه فسيح جناته يارب امين

ومن هذه المدونات حواديت و ما علينا و فى العمق و

إنسانة

جزاكم الله خيرآ ولا أراكم الله مكروه فى عزيزآ لديكم

العريضة المقدمة للامم المتحدة مترجمة

2007-03-18T16:31:00.000+02:00

العريــضة المـقدمـة للامم المتحدة

عام 1967، في حرب شنيعة مستندة على الاحتيال و الخداع ، إسرائيل استطاعت إيقاْع هزيمة بالعرب. أثناء الحربِ، القوّات الإسرائيلية أسرتْ عددا مِنْ المقاتلين المصريينِ، وقامت بتعذيبهم، ومارست بحقهم الإذلال و عاملتهم بلا إنسانيةِ. بعد ذلك، قامت القوات الإسرائيلية بقتل 250 منهم بطريقة وحشية و مهينة ، منتهكةً كُلّ القوانين والأعراف الدولية بل والسماوية أيضا. إسرائيل لَمْ تلتزم ببند واحد من بنود اتفاقيات الأُمم المتّحدةِ التي تَتعلّقُ بمعاملة الأسرى.
مؤخراً، نشرت إسرائيل برنامج وثائقي حول أسوأ جريمة تم ارتكابها في القرن العشرين , فقد قامت بنشر تفاصيل قتل الجنود المصريين مخترقة بذلك القوانين الدولية و القيم الإنسانية , و مستهزئة بمشاعر المصريين و الشعب العربي عامدة إلى إحداث فوضى و انعدام للأمن في البلدان العربية عموما ً و في مصر تحديداً والتي تلتزم باتفاقية سلام مع اسرائيل , ولكن يبدو أن إسرائيل لا تريد أن تلتزم بهذه الاتفاقية من جانبها.
نحن المصريين والشعب العربي، نَدْعو المجتمع الدولي للتَحَرُّك لرَدْع إسرائيل ونطالب بما يلي:
1-على المحكمة الدولية التحري بقضية قتل الأسرى المصريين في حرب1967
2-تحمليها كل المسؤولية عن تلك المذبحة.
3- على إسرائيل أَنْ تَدْفعَ التعويضَ الضروريَ إلى عوائل الضحاي من ناحية، وتقوم بدفع التعويضات إلى الحكومة المصرية من الناحية أخرى وذلك حفاظا على هيبة وكرامة الدولة المصرية.
4-على إسرائيل ان تقدم اعتذارا رسميا إلى الحكومةِ والشعبِ المصري حول الجرائم التي ارتكبت بحق السجناء المصريين.
5- تقديم اعتذارا رسميا إلى الحكومة والشعب المصري على عرضِهم هذه المشاهد المؤلمة.
6- يحظر نشر هذه المشاهدِ في أيّ قناة معلوماتية , لمراعاة لمشاعر الشعب المصري و عوائل الضحايا.

نَدْعو كافة المحامين الشرفاء أيضاً في كُلّ أنحاء العالمِ لتبني قضيتنا وإقامة دعوى ضدّ إسرائيل، التي يتستخف بكل القيم الإنسانيةُ والأخلاقيةُ والقانونيةُ. نَطْالبُ بالعدالة التي تَتوافقُ مع القانونِ الدوليِ، الذي تحترمه كافة الدول ماعدا إسرائيل. و هنا نَتسائلُ، ألم يحن الوقت بعد أَن يحمل المجتمع الدولي إسرائيل مسؤولية مثل كُافة بلدان مِنْ العالمِ؟

رابط الموقع للتوقيع

http://www.petitiononline.com/egypows/petition.html

ترجمة العريضة الاخت ندى من فلسطين وقامت بمراجعتها الاستاذة نوارة

قررت اغير

2007-03-10T12:58:00.000+02:00

قررت اغير وابعد عن الاسبيس فى الهوتميل لانى مش عارفه اتعامل معاه
بس برضو هيفضل هو الاول